Hər il 26 iyun tarixi təntənəli şəkildə Azərbaycan Respublikasında Silahlı Qüvvələr Günü kimi qeyd olunur. Sözügedən əlamətdar gün 1918-ci ildə ilk müntəzəm hərbi hissə olan Əlahiddə Azərbaycan Korpusunun yaradılması əsas götürülərək rəsmiləşdirilib.
Tarixə qısa nəzər yetirək: Əvvəlcə 9 oktyabr tarixi Silahlı Qüvvələr Günü elan edilsə də, Ümummilli Liderimiz Heydər Əliyevin 22 may 1998-ci il tarixli fərmanı ilə tarixi varislik prinsipi əsas götürülərək 26 iyun rəsmi qaydada Azərbaycan Respublikasının Silahlı Qüvvələri Günü elan olunub.
Azərbaycan Ordusu bu gün Cənubi Qafqazın ən güclü və müasir ordularından biri sayılır. Habelə ata yolunu layiqincə davam etdirən Cənab Ali Baş komandan, Prezident İlham Əliyevin rəhbərliyi, qüdrətli siyasəti ilə ordumuz qazandığı möhtəşəm qələbələrlə bütün dünyaya səs, düşmənləri lərzəyə saldı… Azərbaycan həm ədalətli müharibə aparmış dövlət kimi, həm də sülh yolunda böyük örnəkdir, dünyaya dərs keçir.
İkinci Qarabağ savaşının iştirakçısı, veteran, coğrafiya müəllimi Mayis Məmmədov Zefer.media-ya açıqlama verərək bildirib ki, bu gün tariximizin ən şanlı səhifələrindən biridir:
“Çox çətin bir dövrdə 1918-ci ildə yeni yaradılmış Azərbaycan Xalq Cümhuriyyətinin ilk silahlı qüvvələrinin, Milli Ordumuzun yaradılması məhz bu gün baş verib.
Respublikamız yenidən müstəqillik qazandıqda yenə də çox ağır günlər keçirirdi.Torpaqlarımız əzəli düşmənlərimiz Ermənistan ordusu tərəfindən işğal edilirdi. Həmin acınacaqlı dövrdə yenicə yaradılmış ordumuz birinci Qarabağ müharibəsində qəhrəmancasına vuruşaraq torpaqlarımızın azad olunmasına çalışırdı. Amma qarşımızda erməni qüvvələri ilə yanaşı dünyanın ən böyük ordularından biri olan rus silahlı birləşmələri də döyüşürdü”.
Müsahibimiz vurğulayıb ki, nəhayət 2020-ci il, sentyabrın 27-də başlayan 44 günlük Vətən müharibəsində Müzəffər Ordumuz düşmənə sarsıdıcı zərbələr endirərək vaxtilə işğal olunmuş torpaqlarımızı azad etməyə başladı, qəhrəmanlıq dastanını qızıl hərflərlə yazdı:
“Mən də Silahlı Qüvvələrin ehtiyatda olan zabiti kimi könüllü bu müharibəyə qoşularaq bir neçə ağır döyüşlərdə iştirak etmiş və torpaqlarımızın işğaldan azad edilməsində iştirak etmişəm.
İndi qalib dövlətimizdə minlərlə qəhrəman şəhidlərimizin və qazi, veteranlarımizin igidliyi hesabına azad etdiyimiz torpaqlarda Silahlı Qüvvələr Gününü yüksək səviyyədə keçirmək böyük xoşbəxtlikdir.
44 günlük şərəfli savaşımızda əvvəl bölük komandiri, sonra tabor komandiri kimi Cəbrayıl, Hadrut, Qubadlı rayonlarının azad olunması zamanı ən ağır döyüşlərdə iştirak etmişəm. Hətta düşmən qüvvələrini qova-qova Ermənistan sərhədinə kimi çatmışam. Müharibədə bir neçə dəfə kontuziya almışam. Neçə-neçə döyüş yoldaşlarım yanımda şəhid olublar, bəli, belə ağır mənzərələrin şahidi olmuşam. Sonda isə bunu əlavə etmək istəyirəm: Mən fəxr edirəm ki, bu gün bayramını qeyd etdiyimiz qalib ordumuzun qazi zabitiyəm.
Eşq olsun Azərbaycan Ordusuna! Allah qəhrəman şəhidlərimizə rəhmət eləsin!”
Zərintac Mayisqızı
