İran ABŞ ilə mümkün razılaşmanın yekun layihəsini hazırlayaraq qətərli vasitəçilərinə təqdim edib.
Zefer.media xəbər verir ki, bu barədə “The New York Post” qəzeti məlumat yayıb.
Nəşr danışıqlarda iştirak edən ABŞ və regional rəsmilərə istinadən yazır ki, sənəd Vaşinqtona çatdırılması üçün Dohaya göndərilib və tərəflər arasında təmaslar davam edir.
İran hakimiyyətinə yaxın mənbənin sözlərinə görə, sazişin mətni 10 iyun axşamı yekunlaşdırılıb və təsdiqlənib. Hazırda Qətər tərəfi razılaşmanın irəlilədilməsi məqsədilə həm Tehran, həm də Vaşinqtonla əlaqələri davam etdirir.
Danışıqlara qatılan bir ABŞ rəsmisi də layihənin təqdim olunduğunu təsdiqləyib. Bununla belə, sənədin detalları və tərəflərin üzərinə götürəcəyi öhdəliklər hələlik açıqlanmayıb.
“Politico” nəşri isə xəbər verir ki, ABŞ prezidenti Donald Tramp Qətər, Birləşmiş Ərəb Əmirlikləri və Pakistan rəhbərləri ilə aparılan telefon danışıqlarından sonra İrana qarşı planlaşdırılan hərbi zərbə variantından imtina edib.
ABŞ rəsmilərinə və mənbələrə istinadən yayılan xəbərdə bildirilir ki, vasitəçi ölkələr Vaşinqtona İranla ilkin razılaşmanın əldə olunmasının mümkün olduğunu və diplomatik prosesin hələ də açıq qaldığını çatdırıblar.
Məlumata görə, Qətər, BƏƏ və Pakistan Tehranla olan əlaqələrindən istifadə edərək ABŞ tərəfini danışıqlar yolunu davam etdirməyə razı salıb.
Bundan sonra Tramp “əla razılaşma” əldə etməyin mümkün olduğunu bildirib və sənədin yaxın günlərdə imzalana biləcəyini qeyd edib.
Zərintac Mayisqızı
