Hakim Vətəndaş Müqaviləsi Partiyası artıq gələcək parlamentdə əsas vəzifələr uğrunda mübarizəyə başlayıb.
Zefer.media xəbər verir ki, bu barədə “Hraparak” qəzeti məlumat yayıb.
Nəşrin bildirdiyinə görə, yeni parlamentin hələ formalaşmamasına baxmayaraq, partiya daxilində liderlik vəzifələrinin bölüşdürülməsi fəal şəkildə müzakirə olunur.
Qeyd edilir ki, partiya siyahısında ilk 30-35 yeri tutan namizədlərin parlament yerləri alması faktiki olaraq təmin olunur.
Qəzet yazıb ki, xüsusi diqqət Milli Assambleyanın sədrinin vəzifəsinə yönəlib:
“Vətəndaş Müqaviləsi” hazırkı fraksiya lideri Hayk Konjoryanı sözügedən vəzifəyə ən uyğun namizəd hesab edir, bəzi partiya üzvləri isə hazırkı spikerin istefa verməli olduğunu düşünür. Vitse-spiker Ruben Rubinyan da bu vəzifə uğrunda mübarizə aparır, lakin partiya onu həddindən artıq qarşıdurmaçı və həmişə konstruktiv ünsiyyət qura bilməyən hesab edir”.
Eyni zamanda vurğulanıb ki, Ermənistanın ABŞ-dakı keçmiş səfiri Lilit Makuntsun namizədliyi nəzərdən tamamilə çıxarılmayıb, baxmayaraq ki, onun təyin olunma ehtimalı aşağı qiymətləndirilir.
Zərintac Mayisqızı
