Bakının Sabunçu rayonu ərazisində yerləşən tuneldə asfalt örtüyü çöküb. Bu barədə sosial şəbəkələrdə görüntülər yayılıb.
Hadisənin baş vermə səbəbləri ilə əlaqədar Azərbaycan Avtomobil Yolları Dövlət Agentliyindən məlumat yayılıb ki, tunel Azərbaycan Dəmir Yollarının balansındadır.
Mövzu ilə bağlı nəqliyyat eksperti və Azərbaycan Dəmir Yolları QSC-nin mətbuat xidmətinin fikirlərini öyrəndik.
Nəqliyyat məsələləri üzrə ekspert Aslan Əsədov Zefer.media-ya açıqlamasında vurğulayıb ki, sözügedən keçidlə bağlı son dövrlərdə yağış və sel sularının idarə olunması məsələsində müəyyən narahatlıqlar yaranmaqdadır:
“Sabunçu keçidi əvvəllər də Bakının problemli ərazilərindən biri kimi gündəmdə olub.
Həmin ərazinin əsas xüsusiyyətlərindən biri ondan ibarətdir ki, bir neçə iri qəsəbəni bir-biri ilə birləşdirir. Eyni zamanda, digər keçidlərdən fərqli olaraq burada kanalizasiya və yağış sularının axıdılması sistemi ya zəifdir, ya da ümumiyyətlə mövcud deyil. Nəticədə, sular özünə yol taparaq təzyiq yaradır və ona görə də yol örtüyünün çökməsinə gətirib çıxarır.
Hazırda əsas məsələ ərazinin operativ şəkildə nəzarətə götürülməsidir. Aidiyyəti qurumlar tərəfindən körpünün və dayaq elementlərinin zədələnməsinin qarşısını almaq üçün təxirəsalınmaz tədbirlər görülməlidir. Bu, həm mühəndis qurğusunun qorunması, həm də təhlükəsizliyin təmini baxımından vacibdir”.
Ekspert əlavə edib ki, adıçəkilən ərazi kanalizasiya və su təchizatı baxımından zəif inkişaf etmiş zonalardan biridir:
“Bu səbəbdən problemin qısa müddətdə aradan qaldırılması olduqca önəmlidir. Əks halda, belə hallar daha ciddi nəticələrə, o cümlədən insan tələfatına və ərazidə yerləşən digər infrastruktur obyektlərinin, xüsusilə də dəmir yolu keçidinin zədələnməsinə səbəb ola bilər”.
Mövzu ilə bağlı Azərbaycan Dəmir Yolları QSC-nin mətbuat xidmətinin rəhbəri Bəxtiyar Hacıyev deyib ki, Sabunçu rayonu ərazisindəki tuneldə yolun bir hissəsinin çökməsinə səbəb sonuncu güclü yağıntılar zamanı tunelin çıxışındakı kanalizasiya quyusunun daşması olub: “Aidiyyəti qurumlarla birgə tunel ərazisində əsaslı təmir işləri aparıldıqdan sonra yolun bərpasına başlanılacaq”.
Aytən Yalçınqızı
