İş axtararkən insanların ən həyəcan keçirdiyi an müsahibəsi mərhələsidir. Çünki əsas həlledici məqam o an olur. Bir çox amillər var ki, müsahibədə riayət edilməlidir.
İnsan Resursları üzrə mütəxəssis (HR) Röyal Əhmədov Zefer.media-ya açıqlamasında deyib ki, namizədlərin etdiyi çox səhv də elə müsahibə ilə bağlıdır:
“Müsahibəyə vaxtında getmək şirkətlərin, işə götürəcək hüquqi şəxslərin diqqətində olacaq məqamdır. Çünki namizədin gecikməsinin tərəfdarı olmurlar. Sözsüz ki, müsahibəyə zamanında çata bilməyənlərin müəyyən səbəblər ola bilər. Amma ən azından qabaqcadan məlumat verilə bilər. Təəssüf ki, bəzi hallarda namizədlər heç bir şey demirlər”.
Röyal Əhmədov vurğulayıb ki, bir çox hallarda qurumlar stresə salmaq metodu ilə namizədi sınamağa çalışırlar:
“Məsələn saat 12-də təyin olunmuş müsahibəyə 1-in yarısı, hətta 1 bəzi şirkətlərdə isə 2-yə kimi namizədi gözlədirlər, onun səbrini, məsuliyyətini yoxlayırlar. Bu da yaxşı durum deyil. İş üçün müraciət edən şəxslər normal olaraq geyimə diqqət göstərməlidirlər, buna xüsusi nəzər yetirilir. Çox da özündən razı olmaq da bir şey deyil, amma öz güvən önəmlidir. Elə zaman olur ki, işə götürənlər stresə salan suallar verir . Hansısa bir metoddan istifadə edə bilərlər. Bu zaman namizəd öz sakitliyini qorumalıdır. Əlbəttə, istənilən müsahibələrdə həyəcan olacaq. Lakin həyəcanı idarə etməyi bacarmaq vacibdir”.
Zərintac Mayisqızı
