Əksəriyyətimizə yaxşı məlumdur ki, son dövrlər mənzillərin qiyməti kəskin şəkildə artmaqdadır. İstər ev almaq, istər kirayə tutmaq bir çox şəxsin büdcəsini aşmağa başlayıb. Artıq yaz fəslindəyik, görəsən bu aylarda əmlak bazarında mənzillərin qiyməti necə nəzərdə tutulub?
Əmlak eksperti Elnur Fərzəliyev Zefer.media-ya açıqlamasında deyib ki, mövsümi olaraq hər ilin mart ayının sonlarından başlayaraq, avqust ayının sonuna qədər torpaq sahələri, fərdi yaşayış evləri və bağ evlərinə tələbat artır:
“Əvvəlki illərdə bu daha çox Bakıətrafı ərazilərdə baş verirdisə, lakin son illər vətəndaşların bir qismi bağ evlərini təkcə Bakı və Abşeron ərazisində deyil, həmçinin ölkənin turistik bölgələrində də əldə edirlər. Turistik zonalarda bağ evləri alırlar, istədikləri vaxt yaşayırlar. Digər aylarda isə həmin mənzilləri gündəlik kirayə verərək qazanca nail olurlar”.
Elnur Fərzəliyev vurğulayıb ki, son günlər güclü yağışlar səbəbindən su basma hallarının baş verməsi xüsusilə Bakı və Abşeron yarımadasında yüzlərlə fərdi yaşayış evlərinin su altında qalması ilə nəticələnib:
“Bu Bakı və Abşeronun bir yox, müxtəlif ərazilərində baş verdiyi üçün artıq fərdi yaşayış evləri bir növ riskli əmlaklara çevrilib. Hansı ki, son zamanlar tələbat daha çox fərdi yaşayış mənzillərinə idi. Buna səbəb paytaxt ərazisindəki söküntülər idi. Əmlak alıcılarının böyük qismi, əsasən az təminatlı ailələr belə ərazilərdəki ucuz evlərə üz tuturdular. Lakin baş verən yağış, su basma nəticəsində həmin fərdi yaşayış evlərinə tələbatı kəskin azaldacaq və onların qiymətlərinin kəskin enəcəyi gözlənilir. Adıçəkilən fərdi yaşayış evləri kimi çox sayda mənzillər satışa çıxarıla bilər. Satışa çıxarılması həm mövsümi, həm də onların su altında qalmasıdır. Kirayə bazarında isə qiymətlər bahadır, çünki əmlak bazarında satış qiymətləri artdıqca onların kirayə qiymətləri də qalxır. Hər hansı mənzilin kirayə qiyməti həmin əmlakın bazar dəyərinin 0,5 faiz nisbəti ilə hesablanır. Bir evin satış qiyməti 100 min manatdırsa, onun kirayə qiyməti ortalama 500 manat olur. Ümumiyyətlə son illər əmlak bazarında baş verən qiymət artımları bir mənalı olaraq onların kirayə qiymətlərinin artırılmasına gətirib çıxarıb”.
Zərintac Mayisqızı
