İsrail ordusunun Baş Qərargah rəisi Eyal Zamir ölkənin canlı qüvvə böhranı ilə üz-üzə olduğunu bəyan edib.
Zefer.media xəbər verir ki, bu barədə İsrailin dövlət televiziyası “KAN” məlumat yayıb.
Qeyd olunub ki, Zamir Təhlükəsizlik Kabinetinin iclasında nazirlərə müraciət edərək strateji xəbərdarlıqlar səsləndirib.
İran və Livana qarşı hərbi əməliyyatların davam etdiyi, eyni zamanda Qəzza zolağının bir hissəsinin işğal altında saxlanıldığı və İordan çayının qərb sahilindəki yeni məskunlaşma yerlərinin təhlükəsizliyinin təmin edildiyi bir şəraitdə ordunun resurslarının tükəndiyi bildirilir. Zamir qeyd edib ki, artan döyüş tapşırıqları qarşısında əsgər sayı kəskin şəkildə azalır: “Bizim təcili olaraq daha çox şəxsi heyət və əsgərə ehtiyacımız var. Əgər bu böhrana effektiv həll yolu tapılmasa, ordu daxildən çökəcək”.
İclasda iştirak edən digər yüksək rütbəli hərbçilər də vəziyyətin kritik olduğunu vurğulayıblar. Onlar icra olunmalı vəzifələrin sayının artmasına baxmayaraq, canlı qüvvənin azalmasına diqqət çəkiblər. Hərbi rəhbərlik, həmçinin icbari hərbi xidmət müddətinin uzadılması ilə bağlı qərarın ləğv edilməsini canlı qüvvə çatışmazlığını dərinləşdirən əsas amillərdən biri kimi xatırladıblar.
Aytən Yalçınqızı
