“95 nömrəli tam orta məktəbdə yaranmış ciddi problemlə bağlı sizdən kömək istəyirik.
Artıq 1 həftədir 5-ci sinifdə oxuyan uşaqlar dərsə getmirlər. Məktəbin ayaq yollarında çox pis qoxu və ciddi sanitar problem var”.
Bu şikayəti bir qrup valideyn Zefer.media saytına bildirib.
“Qoxu siniflərə də yayılır və uşaqlar sinifdə normal şəkildə otura bilmirlər.
Valideynlər olaraq sözügedən məsələ ilə bağlı məktəb direktoruna müraciət etmişik. Direktor isə bizə “usta tapın, remont etdirin” söyləyib.
Biz valideynlər olaraq soruşuruq: dövlət məktəbində sanitar qovşağın təmiri və uşaqlar üçün normal, sağlam şəraitin yaradılması niyə valideynlərin üzərinə düşməlidir?
Ən əsası, artıq 1 həftədir 5-ci sinif şagirdləri dərsə getmir, amma bununla maraqlanan yoxdur ki, uşaqlar niyə dərsə gəlmirlər və problem nədir.
Xahiş edirik, məsələ hərtərəfli işıqlandırılsın, problem aradan qalxsın”, – deyə onlar vurğulayıb.
Məsələni aydınlaşdırmaq üçün Bakı şəhəri üzrə Təhsil İdarəsinin mətbuat xidmətinə sorğu ünvanladıq.
Bizə bildirildi ki 2026-2027-ci tədris ilinə hazırlıq çərçivəsində tətil müddətində məktəb binasında və sanitar qovşaqlarda zəruri cari təmir və bərpa işləri həyata keçirilib:
“Sanitar qovşaqlar tam işlək vəziyyətə gətirilib, antiseptik və gigiyenik normativlərə cavab verən şərait təmin olunub. Hazırda məkanda antisanitar vəziyyət müşahidə edilmir, kəskin qoxu riski mövcud deyil.
Təhsil müəssisəsinin cari saxlanılması və təmir işləri müvafiq dövlət qurumları tərəfindən planlı şəkildə həyata keçirilir. Bu baxımdan məktəb rəhbərliyi ilə bağlı irəli sürülən iddialar tamamilə əsassızdır və həqiqəti əks etdirmir.
Sözügedən sinif otağı keçən tədris ilində də istifadədə olub, həmin otaqda 11-ci sinif şagirdləri tədris prosesini uğurla başa vurublar. Otaq dezinfeksiya olunub, havalandırma və işıqlanma dərəcəsi fiziki-gigiyenik standartlara tam cavab verir.
Təhsil müəssisəsində hər bir şagirdin təhsildən yayınmaması üçün mütəmadi monitorinqlər aparır. Məktəb rəhbərliyi tərəfindən şagirdlərin davamiyyəti diqqətdə saxlanılır və valideynlərlə maarifləndirici söhbətlər aparılır.
İnanırıq ki, bütün valideynlər məktəbdaxili qaydalara hörmətlə yanaşacaq və effektiv tədris mühitinin davam etdirilməsinə dəstəklərini əsirgəməyəcəklər”.
Valideynlərin verdiyi son məlumata görə isə məktəbin tapdığı üsul isə ayaq yolunu bağlamaqdır.
Müdriklər “təkcə ölümə çarə yoxdur” deyirlər.
Lakin görürük ki, bir məktəb sanitar qovşağı bərpa etməkdə aciz qalıb, valideynlərin üstünə atır…
