5 may Azərbaycanda Xalçaçı Günü peşə bayramı kimi qeyd olunur.
Zefer.media xəbər verir ki, bu əlamətdar tarix “Azərxalça” ASC-nin yaradılması ilə bağlıdır və Azərbaycan xalça sənətinin inkişafında rolu olan ustaların, xalçaçıların əməyini qiymətləndirmək məqsədi daşıyır.
Sözügedən peşə bayramı ölkəmizdə 2019-cu ildən etibarən, xüsusilə “Azərxalça”nın fəaliyyəti çərçivəsində rəsmi olaraq keçirilir.
Ulu Öndərin yolunu uğurla davam etdirən Prezident İlham Əliyev xalçaçılığın inkişafına da böyük diqqət və qayğı göstərir. Ölkə rəhbərinin müvafiq sərəncamları ilə “Azərxalça” Açıq Səhmdar Cəmiyyətinin yaradılması, “Xalçaçı Günü” peşə bayramının təsis edilməsi, respublikamızın şəhər və rayonlarında xalça istehsalı emalatxanalarının tikilib istifadəyə verilməsi həmin sənəti yaşadanlara göstərilən böyük dövlət qayğısının parlaq təzahürüdür. Məhz bu diqqət və qayğının bariz nümunəsi kimi Prezident İlham Əliyev mayın 4-də Azərbaycan xalçaçılarının “Tərəqqi” medalı ilə təltif edilməsi haqqında Sərəncam imzaladı. Sərəncama əsasən, Azərbaycanda xalçaçılıq sənətinin inkişafında səmərəli fəaliyyətlərinə görə, 18 nəfər “Tərəqqi” medalı ilə təltif edilib.
Ölkəmizdə xalçaçılıq sənətinin iqtisadiyyatımızdakı rolunu yüksək dəyərləndirən Dövlət başçısının diqqət və qayğısı ilə 2016-2020-ci illərdə “Azərxalça” Açıq Səhmdar Cəmiyyətinin 20-dən çox filialı yaradılaraq fəaliyyətə başlayıb.
Milli mədəniyyətimizin inkişafında böyük rolu olan Birinci vitse-prezident Mehriban xanım Əliyeva da xalçaçılığın yaşadılmasına öz dəyərli töhfələrini verir. Xalçaçıların problemlərinin aradan qaldırılmasında, onların fəaliyyət imkanlarının genişləndirilməsində, nailiyyətlərinin beynəlxalq miqyasda təbliğində Mehriban xanımın xidmətləri misilsizdir. Onun təşəbbüsü ilə Keniyanın Nayrobi şəhərində keçirilən UNESCO-nun Qeyri-Maddi Mədəni İrs üzrə Hökumətlərarası Komitəsinin V sessiyasında Azərbaycan xalçaçılıq sənəti UNESCO-nun Bəşəriyyətin Qeyri-Maddi İrsin nümunələri siyahısına daxil olunub.
“Azərbaycan Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı”nda xalçalarımızın ölkə brendi olaraq dünya bazarına ixrac olunması qarşıya qoyulan əsas vəzifələrdən biridir.
Bütün xalçaçıları əlamətdar gün münasibətilə təbrik edirik, fəaliyyətlərində nailiyyətlər arzulayırıq. Onlar adıçəkilən gözəl sənəti dünyaya tanıtdıran, əlləri qızıl zəhmətkeşlərdir!
Zərintac Mayisqızı
