4-cü Şuşa Qlobal Media Forumu çərçivəsində “Media obyektivində sülh quruculuğu və ictimai diskurs” mövzusunda ilk panel müzakirə keçirilib.
“AnewZ” beynəlxalq televiziya kanalının aparıcısı Nadia Gyanenin moderatorluğu ilə baş tutan panel müzakirədə Mərakeş Krallığının Audiovizual Kommunikasiya üzrə Ali Qurumunun prezidenti Latifa Akharbach qeyd edib ki, qloballaşma və rəqəmsal texnologiyaların sürətli inkişafı beynəlxalq münasibətlərin xarakterini dəyişdirməklə yanaşı, medianın ictimai diplomatiya və strateji kommunikasiya sahəsində rolunu daha da artırıb. O, media vasitəsilə formalaşan ictimai diskursun cəmiyyətlər arasında qarşılıqlı anlaşmanın möhkəmləndirilməsinə və sülh mədəniyyətinin təşviqinə mühüm töhfə verdiyini vurğulayıb.
Qazaxıstan Respublikasının mədəniyyət və informasiya nazirinin birinci müavini Kanat İskakov isə bildirib ki, müasir informasiya mühitində media yalnız məlumat ötürən vasitə kimi deyil, həm də ictimai rəyin formalaşmasına təsir göstərən strateji platforma kimi çıxış edir. O qeyd edib ki, etik prinsiplərə əsaslanan media fəaliyyəti etimadın gücləndirilməsi, dezinformasiyanın təsirlərinin azaldılması və davamlı dialoq mühitinin formalaşdırılması baxımından xüsusi əhəmiyyət daşıyır. Panel müzakirə zamanı media vasitəsilə ictimai diplomatiyanın gücləndirilməsi, konstruktiv ictimai diskursun təşviqi, informasiya mübadiləsinin genişləndirilməsi və qlobal çağırışlar fonunda medianın sülh quruculuğuna verdiyi töhfələri əhatə edən məsələlər müzakirə olunub.
