Çeçenistan rəhbəri Ramzan Kadırovun 19 yaşlı oğlu Adam Kadırov dövlət rəsmilərinin övladlarından ibarət “K-13 komandası” adlı yeni silahlı dəstə yaradıb.
Zefer.media “Vyorstka” nəşrinə istinadən xəbər verir ki, nəşrin araşdırmasına görə, dəstənin silahlı 18 üzvündən yarıdan çoxu Kadırovların qohumları, yaxud Çeçenistanın yüksək vəzifəli məmur və güc strukturları əməkdaşlarının övladlarıdır.
Elit dəstənin tərkibində Çeçenistanın baş nazirinin oğlu, nüfuzlu məmurların qardaşı oğulları, Kadırovun və həyat yoldaşının qohumları yer alır. Dəstəyə vaxtilə “Noxço” ansamblında rəqqas olmuş, sonradan mühafizəçi kimi çalışmış şəxs də daxil edilib.
“K-13” komandasının yaradıcıları istənilən vaxt və istənilən yerdə verilən bütün tapşırıqları yerinə yetirəcəklərini təntənəli şəkildə bəyan edirlər.
Bununla belə, bu dəstənin konkret olaraq hansı fəaliyyətlə məşğul olduğu məlum deyil. Jurnalistlər onun real əməliyyatları və ya nailiyyətləri barədə heç bir məlumat aşkarlamayıblar.
İndiyədək təsdiqlənən yeganə “xüsusi əməliyyat” isə avtomatlarla fotosessiya təşkil etmək olub.
Pərvin Hacıyeva
