2020-ci il oktyabrın 2-si — 44 günlük İkinci Qarabağ müharibəsinin altıncı günü cəbhə xəttində tarixi dönüş nöqtələrindən biri kimi yaddaşlara həkk olundu. Müzəffər Azərbaycan Ordusu Ali Baş Komandan İlham Əliyevin rəhbərliyi ilə düşmənin uzun illər ərzində qurduğu möhkəmləndirilmiş müdafiə xətlərini yararaq cəbhənin müxtəlif istiqamətlərində irəliləməyə davam etdi.
Zefer.media xəbər verir ki, altıncı günün ən mühüm hərbi uğurlarından biri Ağdərə istiqamətində qazanıldı. Şücaətli əsgər və zabitlərimiz Madagiz (Suqovuşan) ətrafındakı hakim yüksəklikləri düşməndən təmizləyərək strateji nəzarəti tam şəkildə ələ keçirdilər. Gün ərzində aparılan dəqiq və sarsıdıcı əməliyyatlar nəticəsində Ermənistan silahlı qüvvələrinin 200-dən çox hərbi texnikası, artilleriya qurğuları və canlı qüvvəsi məhv edildi, düşmən panika içində geri çəkilməyə məcbur oldu.
Cəbhədə aciz qalan işğalçı tərəf növbəti dəfə beynəlxalq hüquq normalarını tapdalayaraq dinc əhalini hədəf aldı. Tərtər şəhəri və ətraf kəndlər ağır artilleriyadan atəşə tutulsa da, mülki əhalinin sarsılmaz iradəsi və Ordumuza olan dərin inamı qırılmadı. Müzəffər Ali Baş Komandan İlham Əliyev isə xarici KİV-lərə müsahibələrində Azərbaycanın yalnız öz doğma torpaqlarını azad etdiyini və işğala son qoyulana qədər mübarizənin dayanmayacağını bütün dünyaya bəyan etdi. Vətən müharibəsinin altıncı günü xalqımızın birliyi və ordumuzun qhrəmanlığı ilə Böyük Zəfərə doğru atılan növbəti inamlı addım oldu. Qarabağ Azərbaycandır!
