Yunanıstan hökumətinin sözçüsü Pavlos Marinakis bildirib ki, ölkə Hörmüz boğazı ətrafında mümkün hərbi əməliyyatlarda iştirak etməyəcək və İranla hər hansı münaqişəyə qoşulmaq niyyətində deyil. Onun sözlərinə görə, Afina yalnız Avropa Birliyi çərçivəsində Qırmızı dənizdə həyata keçirilən “Aspides” missiyasında iştirak edir və bu missiya yalnız gəmiçiliyin təhlükəsizliyinin təmin olunmasına yönəlib, həm də coğrafi baxımdan Hörmüz boğazını əhatə etmir. Eyni zamanda qeyd olunur ki, Donald Trump tərəfindən irəli sürülən beynəlxalq dəniz koalisiyası təşəbbüsünə bəzi ölkələr, o cümlədən Yunanıstan qoşulmaqdan imtina edib.
Mövzu ilə bağlı “Zəfər.media”ya açıqlamasında Azərbaycan Mətbuat Şurasının İdarə Heyətinin üzvü, “Bakı Xəbər” qəzetinin baş redaktoru, siyasi şərhçi Aydın Quliyev bildirib ki, Donald Trump-ın çağırışlarına bu cür reaksiya təkcə Yunanıstan üçün xarakterik deyil:
“Əslində, əvvəlcədən də gözlənilirdi ki, onun İran üzərinə genişmiqyaslı dəniz qüvvələri göndərmək təşəbbüsü uğursuz ola bilər.Çünki birbaşa İranın mümkün zərbələrinə məruz qala biləcək Körfəz ərəb ölkələri belə açıq müharibəyə girmək istəmirlər. Bu halda uzaq Avropa və NATO ölkələrinin bu çağırışa qoşularaq İranla birbaşa müharibəyə başlaması real görünmür. Artıq müşahidə olunur ki, Trumpın İrana qarşı dəniz hərbi koalisiyası yaratmaq cəhdi uğursuzluğa doğru gedir.NATO-nun bəzi üzvləri bu müharibədə iştirakdan imtina edir. İtaliya çoxmillətli qüvvələrdəki hərbi kontingentini İraqdan çıxarır. İspaniya öz hərbi bazalarından İrana qarşı istifadə olunmasına icazə vermir. Yunanıstan isə Hörmüz boğazı istiqamətinə hərbi gəmi göndərməkdən imtina edib.Ümumilikdə, Avropa ölkələrinin əksəriyyəti İranla birbaşa qarşıdurmaya tələsmir. Hətta Keir Starmer də Hörmüzdə mümkün qarşıdurmanın NATO missiyası olmadığını açıq şəkildə bildirib.Hazırda Avropa ölkələri İranla münasibətlərdə əsasən “Aspides” adlı missiya çərçivəsində fəaliyyət göstərməyə üstünlük verirlər. Bu, Avropa Birliyinin Qırmızı dənizdə həyata keçirdiyi dəniz əməliyyatıdır və əsas məqsədi Husi hərəkatı tərəfindən Avropa gəmilərinə yönəlmiş hücumların qarşısını almaqdır.Eyni zamanda, bu missiyanın Hörmüz boğazına qədər genişləndirilməsi təklifləri də qəbul edilməyib. Avropa ölkələri qitədən kənar hərbi fəaliyyətlərini hələlik yalnız Qırmızı dənizlə məhdudlaşdırmaq niyyətindədirlər.Bütün bunlar göstərir ki, Trumpın İrana qarşı daha geniş hərbi əməliyyat planları ciddi maneələrlə üzləşir. Hətta belə bir ssenari də mümkündür ki,ABŞ bu bölgədə tək qala bilər. Çünki indiki şəraitdə Avropa və NATO ölkələri bu qarşıdurmanı öz müharibələri kimi deyil, daha çox ABŞ ilə İran arasında bir münaqişə kimi qiymətləndirirlər.Bu vəziyyət isə Trumpın hərbi siyasətinin gələcəyi baxımından müsbət perspektiv vəd etmir. Mövcud reaksiyalar onu deməyə əsas verir ki, bölgədə qüvvələr nisbəti ABŞ-nin ziyanına dəyişə bilər. Yunanıstanın qərarı da Amerikanın bölgədə təklənmək ehtimalının getdikcə artdığını göstərən mühüm siqnallardan biridir”.
Qəmər Kazımzadə
