Ukraynaya məxsus pilotsuz uçuş aparatlarının Rusiyanın Arxangelsk vilayətinə qədər çatdığı və əsas hərbi kosmodromlardan biri olan Plesetskə mümkün hücum həyata keçirdiyi bildirilir.
Zefer.media xarici KİV-lərə istinadən xəbər verir ki, Ukrayna sərhədindən təxminən 1900 kilometr məsafədə yerləşən Arxangelsk vilayətində dronlar ilk dəfə müşahidə olunub. Monitorinq “Supernova+” Telegram kanalı ilkin məlumatlara əsasən, hücumun Plesetsk kosmodromuna yönəldiyini bildirib.
Plesetsk Rusiyanın fəaliyyətdə olan yeganə hərbi kosmodromu hesab olunur. Burada Rusiyanın yeni qitələrarası ballistik raketi “Sarmat”ın sınaqları keçirilib.
2026-cı ildə kosmodromdan hərbi peyklər və “Rassvet” orbital qruplaşmasına daxil olan aparatlarla “Soyuz-2” və “Anqara” raketlərinin bir neçə uğurlu buraxılışının həyata keçirildiyi bildirilir.
Arxangelsk vilayətinin qubernatoru Aleksandr Tsıbulski səhər saatlarında sakinləri sığınacaqlara keçməyə çağırıb və mobil internetin söndürüləcəyi barədə xəbərdarlıq edib. O, dron hücumunun nəticələri barədə məlumat verməyib.
Bundan əvvəl dronlar vilayətin Pineqa rayonunda da müşahidə edilib. Rayon rəhbəri Lyudmila Kolik hücumun “strateji obyektlərə” yönəldiyini bildirib.
Məlumata görə, vilayət ərazisində ümumilikdə 40 PUA-nın məhv edildiyi açıqlanıb. Hadisə nəticəsində zərərçəkənlər barədə məlumat verilməyib.
Qeyd olunur ki, Arxangelsk vilayətində bundan əvvəl də avqustun 1-i və 12-də mümkün dron hücumu təhlükəsi ilə bağlı xəbərdarlıq edilib.
Qeyd: Plesetsk kosmodromunun məhz bu hücumun hədəfi olması barədə məlumat hələlik müstəqil şəkildə təsdiqlənməyib.
Aytən Yalçınqızı
