Özbəkistan Prezidenti Şövkət Mirziyayev bildirib ki, ölkəsi Azərbaycanın Qarabağ bölgəsində həyata keçirilən yenidənqurma və inkişaf prosesinə bundan sonra da töhfə verməyə hazırdır. O, Bakıda keçirilən Liderlər Sammitində çıxışı zamanı Qarabağda aparılan genişmiqyaslı quruculuq işlərini yüksək qiymətləndirib.
Ümumiyyətlə Bakı və Daşkənd türk dövlətləri arasında da əməkdaşlığı genişləndirməyə çalışır və TDT çərçivəsində sıx əlaqələr qururlar. İşğaldan azad edilmiş torpaqlarımızda da təşkilat çərçivəsində xeyli sayda tədbir və görüşlər keçirilib.
Siyasi şərhçi Şakir Ağayev Zefer.media–ya bildirib ki, əslində Özbəkistanın Qarabağda əsas layihəsi Füzuli şəhərində inşa edilən 960 şagird yerlik Mirzə Uluqbəy adına tam orta məktəbdir:
“Şövkət Mirziyayev bu gün Bakıda keçirilən beynəlxalq tədbirdə çıxışı zamanı bildirib ki, ölkəsi Azərbaycanın işğaldan azad edilmiş ərazilərində aparılan yenidənqurma və inşaat prosesinə bundan sonra da töhfə verməyə hazırdır. Bu, Azərbaycan üçün mühüm və müsbət bir haldır və Özbəkistanın yeni investisiya və layihələrdə iştirakının davam etməsi arzuolunandır.Qarabağın bərpasında təkcə Özbəkistan deyil, digər türk dövlətləri də iştirak edir. Məsələn, Qazaxıstan Qarabağda müxtəlif layihələr həyata keçirib. Qırğızıstan Ağdam rayonunun Xıdırlı kəndində məktəb inşası layihəsinə töhfə verib.Türkmənistan isə məscid tikintisi layihəsində iştirak edib.Türkiyə isə həm 44 günlük Vətən müharibəsi dövründə, həm də Qarabağın bərpası mərhələsində Azərbaycana siyasi və texniki dəstək göstərib, bir çox tikinti və infrastruktur layihələrində Türkiyə şirkətləri iştirak edir. Hazırda sözügedən əməkdaşlıq əsasən iqtisadi, humanitar və aqrar sahələri əhatə edir. Hesab edirəm ki, türk dövlətləri Qarabağa investisiyaları daha da artırmalıdırlar. Qarabağda təkcə sosial layihələr deyil, həm də böyük sənaye müəssisələri və texnoloji parklar yaradılır.Qarabağ gələcəkdə Zəngəzur dəhlizi ilə birlikdə beynəlxalq əhəmiyyətli logistika mərkəzinə çevriləcək. Bu baxımdan, türk dövlətlərinin bu prosesdə daha fəal iştirakı çox vacibdir”.
Qəmər Kazımzadə
