Turistlərin səyahət xərcləri turizm statistikasının əsas göstəricilərindən biridir və ölkənin turizm gəlirlərinin hesablanmasında mühüm rol oynayır. Yay mövsümündə xeyli sayda Azərbaycandan digər ölkələrə gedənlər, başqa yerlərdən isə Azərbaycana gələnlər olur.
Görəsən, səyahət xərcləri necə hesablanır?
Turizm üzrə ekspert Rəhman Quliyev Zefer.media-ya açıqlamasında bildirib ki, ölkəmizə gələn turistlərin xərcləri əsasən yerləşmə, qidalanma, nəqliyyat, alış-veriş, əyləncə və digər xidmətlərə çəkilən vəsait əsasında qiymətləndirilir.
“Həmin məlumatlar adətən sərhəd-keçid məntəqələrində keçirilən sorğular, rəsmi statistika və digər məlumat mənbələri vasitəsilə toplanır. Gəlmə turizmi üzrə xərclər ölkəyə daxil olan valyuta axınının həcmini göstərən vacib göstəricilərdən hesab olunur. Xaricə səfər edən Azərbaycan vətəndaşlarının xərcləri də oxşar metodologiya ilə müəyyənləşdirilir. Gedən turistlərin xərclərinə nəqliyyat, yerləşmə, qidalanma, alış-veriş, tibbi xidmətlər və digər səyahət xərcləri daxil edilir. Bu bilgilər ölkədən çıxan valyuta axınının qiymətləndirilməsi baxımından mühüm əhəmiyyət daşıyır. Gələn və gedən turistlərin xərclərinin müqayisəsi turizm balansının təhlili və sektorun iqtisadi təsirinin qiymətləndirilməsi üçün istifadə olunur. Dəqiq və etibarlı statistika turizm siyasətinin formalaşdırılmasına, investisiya qərarlarının qəbuluna və marketinq strategiyalarının hazırlanmasına kömək edir. Ona görə də turist xərclərinin beynəlxalq metodologiyaya uyğun şəkildə ölçülməsi turizm sektorunun davamlı inkişafı üçün mühüm əhəmiyyət daşıyır”, – deyə o vurğulayıb.
