ABŞ prezidenti Donald Tramp Tehranın Hörmüz boğazını açdığını elan etməsinə baxmayaraq, İrana qarşı tətbiq olunan dəniz blokadasının qüvvədə qalacağını bildirib.
Zefer.media xəbər verir ki, Ağ Ev rəhbəri Tramp bu barədə “TruthSocial” sosial media platformasında paylaşım edib.
O yazıb ki, Hörmüz boğazı artıq tam açıqdır və maneəsiz ticarət üçün hazırdır, lakin blokada yalnız İranla razılaşma tam yekunlaşana qədər davam edəcək.
“Hörmüz boğazı tam açıqdır və biznes və maneəsiz keçid üçün hazırdır, lakin dəniz blokadası İranla bağlı razılaşmamız 100% tamamlanana qədər yalnız İrana qarşı tam qüvvədə qalacaq”, – deyə Tramp qeyd edib.
ABŞ prezidenti əlavə edib ki, danışıqlar prosesi sürətlə irəliləməlidir və razılaşmanın əsas məqamlarının artıq böyük ölçüdə razılaşdırıldığını vurğulayıb.
Zərintac Mayisqızı
