Ukraynanın Moskvanın hava limanlarına süni intellektlə idarə olunan 1000-ə qədər avtonom drondan istifadə etməklə genişmiqyaslı hücum planı hazırladığı iddia olunur.
Zefer.media “The Atlantic”ə istinadən xəbər verir ki, məlumatı iki məlumatlı mənbə təsdiqləyib.
Nəşrin məlumatına görə, “M&Ms” kod adlı əməliyyatın hazırlanmasına Ukraynanın sabiq müdafiə naziri Mixail Fedorov rəhbərlik edib. Plana əsasən, bir gecə ərzində çoxsaylı kiçik və ucuz pilotsuz uçuş aparatlarının buraxılması, bununla Rusiyanın hava hücumundan müdafiə sistemlərinin yüklənməsi və Moskva hava limanlarının fəaliyyətinin uzun müddət pozulması nəzərdə tutulub.
Ukrayna tərəfinin hesablamalarına görə, belə bir əməliyyat “Turkish Airlines” və “Emirates” də daxil olmaqla iri beynəlxalq aviaşirkətləri Moskvaya uçuşları dayandırmağa vadar edə və Rusiya hakimiyyətinə əlavə təzyiq yarada bilərdi.
“The Atlantic”in məlumatına görə, plan 2026-cı ilin əvvəlində Ukrayna Prezidenti Vladimir Zelenskiyə təqdim olunub. Zelenski mülki təyyarələrin vurulması və mümkün insan itkiləri riskindən narahat olsa da, əməliyyatın hazırlanmasının davam etdirilməsinə icazə verib.
Məlumata əsasən, Fedorovun iyul ayında vəzifəsindən istefa verməsindən sonra layihə üzərində iş dayandırılıb. Mənbələrdən biri əməliyyatın texniki baxımdan yeni komanda ilə təxminən üç ay ərzində yenidən bərpa edilə biləcəyini bildirib.
Qeyd olunur ki, məlumatlar mənbələrin iddialarına əsaslanır və əməliyyatın faktiki olaraq həyata keçirilib-keçirilmədiyi barədə məlumat verilmir.
Aytən Yalçınqızı
