İranın İslam İnqilabı Keşikçiləri Korpusu (SEPAH) İordaniyada yerləşən Kral Feysəl və Şahzadə Həsən adına ABŞ hərbi bazalarına raket və pilotsuz uçuş aparatları (PUA) ilə zərbələr endirdiyini bəyan edib.
Zefer.media Caliber – ə istinadən xəbər verir ki, bəyanata əsasən, hücum zamanı F-15 qırıcılarının uçuşa hazırlanması üçün istifadə olunan anqarlardan biri vurulub.
Bundan əlavə, PUA-ların hazırlanması məqsədilə istifadə edilən digər anqara endirilən zərbə nəticəsində qablaşdırılmış vəziyyətdə olan səkkiz ədəd yeni MQ-9 pilotsuz uçuş aparatı tamamilə məhv edilib. Açıq ərazidə yerləşdirilmiş daha iki MQ-9 isə ciddi zədələnib.
SEPAH-ın məlumatına görə, növbəti hücum zamanı bazadakı helikopter anqarı da vurulub və nəticədə ABŞ ordusuna məxsus iki ağır hərbi helikopter ciddi zərər görüb.
Bəyanatda həmçinin bildirilir ki, hücumun növbəti mərhələsində bazanın şəxsi heyətinin yerləşdiyi yaşayış sahəsinə də zərbə endirilib. Nəticədə ölən və yaralananların olduğu qeyd edilir.
Qeyd edək ki, bu məlumat SEPAH tərəfindən yayılıb və hələlik müstəqil mənbələr tərəfindən təsdiqlənməyib.
