Rusiya ordusunun gecə və səhər saatlarında Ukraynanın müxtəlif bölgələrinə endirdiyi zərbələr nəticəsində azı 18 nəfər yaralanıb, bir sıra infrastruktur və yaşayış obyektlərinə ziyan dəyib.
Zefer.media Caliber-ə istinadən xəbər verir ki, bu barədə “Ukrinform” məlumat yayıb.
Məlumata görə, Dnepropetrovsk vilayətinin Krivoy Roq şəhərində gecə saatlarında baş verən hücum nəticəsində yaralananların sayı üçə çatıb. 46 və 58 yaşlı iki kişi orta ağır vəziyyətdə xəstəxanaya yerləşdirilib. Hücum nəticəsində sənaye müəssisəsinə də ziyan dəyib.
Nikopol rayonunda isə Nikopol şəhəri və Marhanets icması artilleriya və dron hücumlarına məruz qalıb. Burada da müəssisəyə ziyan dəydiyi bildirilib.
Xerson vilayətində son sutka ərzində Xerson şəhəri də daxil olmaqla, onlarla yaşayış məntəqəsinə aviasiya, dron və artilleriya zərbələri endirilib. Nəticədə 18 nəfər yaralanıb. Yaralananlar arasında bir uşağın da olduğu bildirilir.
Odessada isə gecə və səhər saatlarında həyata keçirilən hücumlar nəticəsində infrastruktur obyekti, təhsil müəssisəsi və çoxmərtəbəli yaşayış binasına ziyan dəyib. Hazırda şəhərdə ölən və yaralananlarla bağlı məlumat daxil olmayıb.
Qəmər Kazımzadə
