Rusiya Ermənistandan süd məhsullarının idxalına növbəti məhdudiyyət tətbiq edib.Qərara səbəb istehsal zamanı yoluxmuş heyvanlardan əldə edilən südün istifadə olunmasının aşkarlanması göstərilib.
Zefer.media xəbər verir ki, bu barədə Rusiyanın Baytarlıq və Fitosanitar Nəzarət üzrə Federal Xidməti (“Rosselxoznadzor”) məlumat yayıb.
Belə ki, iyulun 14–21-də bir sıra erməni müəssisəsində aparılan yoxlamalar zamanı Rusiyaya ixrac edilən süd məhsullarının istehsalında yoluxmuş heyvanlardan əldə olunan südün istifadə edildiyi müəyyən olunub.
“Aşkar edilmiş pozuntuları nəzərə alaraq, Rusiyaya xüsusi təhlükəli infeksiyaların daxil olmasının və daxili bazarda təhlükəsiz olmayan süd məhsullarının satışının qarşısını almaq məqsədilə müvafiq məhdudlaşdırıcı tədbirlər görülüb. Bu hadisə Ermənistanın, o cümlədən 2019-cu ildə hökumətin həyata keçirdiyi islahatların nəticəsində kənd təsərrüfatı istehsalçıları üzərində effektiv nəzarəti təmin edə bilmədiyini bir daha təsdiqləyir”, – deyə “Rosselxoznadzor”un açıqlamasında vurğulanıb.
Qəmər Kazımzadə
