Ermənistan Avrasiya İqtisadi İttifaqında (Aİİ) müttəfiqləri ilə Avropa İttifaqına üzvlük hazırlığı ilə bağlı məsləhətləşmələr aparmır.
Zefer.media RİA Novosti-yə istinadən xəbər verir ki, bunu Rusiya Xarici İşlər Nazirliyinin MDB ölkələri üzrə Birinci departamentinin direktoru Mikael Aqasandyan bildirib.
Onun sözlərinə görə, Ermənistanın Aİ-yə üzvlüyə hazırlığını qanunvericilik səviyyəsində təsbit etməsi Rusiya tərəfinin ciddi risklər görməsinə səbəb olur.
Bundan əvvəl Ermənistanın Baş naziri Nikol Paşinyan İrəvanın yaxın vaxtlarda Avropa İttifaqına üzvlüklə bağlı rəsmi müraciətə hazırlığa başlaya biləcəyini bildirib. Onun sözlərinə görə, bundan sonra ölkənin Aİ-yə qoşulması və Aİİ-dən çıxması ilə bağlı referendum keçirilməsi nəzərdə tutulur.
Paşinyan həmçinin Ermənistanın qarşıdakı beş il ərzində Kollektiv Təhlükəsizlik Müqaviləsi Təşkilatında (KTMT) fəal fəaliyyətə qayıtmayacağını və ölkənin təşkilatdan xaric edilməsindən “çox məmnun” olacağını deyib.
Rusiya Kremlinin daha əvvəl bildirdiyinə görə, Avropa İttifaqının normaları Aİİ-nin qaydaları ilə ziddiyyət təşkil edir və Ermənistanın Avropaya inteqrasiyası ölkə iqtisadiyyatına mənfi təsir göstərə bilər.
Aytən Yalçınqızı
