Rusiya Nəqliyyat Nazirliyi Azov dənizində gəmiləri hədəf alan dron hücumları səbəbindən naviqasiya təhlükəsizliyini təmin etmək və gəmiləri qorumaq üçün əlavə tədbirlər görüldüyünü açıqlayıb.
Zefer.media xəbər verir ki, buna dair nazirlikdən verilən yazılı açıqlamada Azov dənizindəki “gərgin vəziyyət” səbəbindən Azov və Qara dəniz hövzələrində yük daşınmasının fasiləsiz həyata keçirilməsinin təmini üçün işlərin davam etdiyi bildirilir.
Bəyanatda nəqliyyat fəaliyyətlərini əlaqələndirmək üçün xüsusi əməliyyat mərkəzinin yaradıldığı və bu mərkəzin alternativ logistika marşrutları yaradacağı və yük axınının avtomobil və dəmir yolu kimi digər nəqliyyat növlərinə yönləndiriləcəyi qeyd olunur.
Bəyanatda əlavə edilir ki, məqsədin yüklərin vaxtında və tam çatdırılmasını təmin etmək olduğu və bəzi liman operatorlarının texnoloji imkanlarına uyğun olaraq əlavə yükləri qəbul etməyə və terminallarda daşınma sürətini artırmağa hazır olduqları deyilir.
Bəyanatda Rusiya Müdafiə Nazirliyi ilə koordinasiyanın aparıldığı və Azov və Qara dəniz hövzələrində dəniz nəqliyyatının təhlükəsizliyini artırmaq, ticarət gəmilərini qorumaq və yük daşınmasında fasilələrin qarşısını almaq üçün əlavə tədbirlərin həyata keçirildiyi vurğulanır.
Digər tərəfdən, bəyanatda görülən təhlükəsizlik tədbirlərinin məzmunu ilə bağlı təfərrüatlar paylaşılmayıb.
Rusiya və Ukrayna son zamanlar Qara və Azov dənizlərində gəmilərə və limanlara qarşılıqlı hücumlarını artırıblar.
Zərintac Mayisqızı
