Bu gün Pakistanda sərnişin avtobusunun dərəyə aşması nəticəsində azı 40 nəfər həlak olub, 8 nəfər isə yaralanıb.
Zefer.media xəbər verir ki, hadisə səhər saatlarında Bəluçistan və Xayber Paxtunxva əyalətlərinin sərhədində yerləşən Dana Sar rayonunda baş verib.
Kvettadan İslamabada hərəkət edən avtobusun sürücüsü dağ yolunda idarəetməni itirib və nəqliyyat vasitəsi dərin dərəyə düşüb.
Məlumata görə, avtobusda ümumilikdə 48 nəfər olub. İlkin ehtimallara əsasən, nəqliyyat vasitəsi normadan artıq sərnişin daşıyırmış. Bildirilir ki, bəzi sərnişinlər əvvəlki avtobusun nasazlığı səbəbindən bu avtobusa miniblər.
Hadisənin səbəblərinin müəyyənləşdirilməsi üçün araşdırma başlanılıb. Səlahiyyətli qurumlar sürət həddinin aşılması və digər mümkün qayda pozuntularını araşdırırlar.
Zərintac Mayisqızı
