Bu gün İran prezidenti Məsud Pezeşkian ölkənin müdafiəsinin hər bir xalqın hüququ olduğunu bildirib.
Zefer.media xəbər verir ki, Pezeşkian çıxışında İranın ABŞ ilə diplomatik həll yolları axtardığı bir vaxtda hərbi hücuma məruz qaldığını deyib.
Onun sözlərinə görə, həmin dövrdə İranın ali rəhbəri, hərbi komandanları, rəsmiləri, alimləri, tələbələri və vətəndaşları həlak olub, ölkənin şəhərləri və infrastrukturu hədəfə alınıb.
İran prezidenti qeyd edib ki, müharibənin təşəbbüskarı Tehran olmayıb, ancaq İran bu təcavüzə qarşı müqavimət göstərib.
“Ölkəni müdafiə etmək hər bir millətin haqqıdır. İran da bu hüquqdan istifadə edib”, – Pezeşkian əlavə edib.
O, müsəlman ölkələri arasında qarşıdurmaya yol verilməməli olduğunu vurğulayıb: “Heç bir müsəlman ölkəsi başqa bir İslam torpağına qarşı təcavüz platformasına çevrilməməlidir və heç bir İslam ölkəsi qonşusunun hesabına öz təhlükəsizliyini təmin etməməlidir”.
Zərintac Mayisqızı
