Fransa Ukraynanın Avropa İttifaqının maliyyə vəsaiti hesabına Avropadan kənardan hərbi məhsullar almasına tətbiq edilən istisnaların müddətinin məhdudlaşdırılmasını təklif edir.
Zefer.media “Euronews”a istinadən xəbər verir ki, söhbət Aİ-nin Ukrayna üçün ayırdığı 90 milyard avroluq dəstək kreditindən gedir. Paris bu vəsait hesabına alınan silah və hərbi komponentlərin tədricən Avropa müdafiə sənayesindən əldə edilməsini istəyir.
Müzakirə olunan məsələlər arasında Ukraynanın Çin istehsalı dron komponentləri və ABŞ istehsalı “Patriot” raketləri almasına verilən istisnaların müddətinin məhdudlaşdırılması da var. Ukrayna hazırda Avropa istehsalçılarının tələb olunan həcmdə və müddətdə təchizat təmin edə bilməməsi səbəbindən bu məhsulların alınmasına icazə əldə edib.
Fransanın mövqeyinə əsasən, uzunmüddətli perspektivdə Ukraynanın hərbi sifarişləri Avropa müdafiə sənayesinə yönəldilməlidir.
Lakin Almaniya, Polşa, İsveç və Baltikyanı ölkələr də daxil olmaqla bəzi Aİ üzvləri Kiyevə silah və hərbi avadanlıq seçimində mümkün qədər geniş sərbəstlik verilməsinin tərəfdarıdır.
Qeyd edək ki, Fransa son günlər Ukraynanın hava hücumundan müdafiəsinin gücləndirilməsi və ABŞ istehsalı “Patriot” raketlərinin əldə olunması məsələsində də dəstəyini ifadə edib.
Aytən Yalçınqızı
