Macarıstanın paytaxtı Budapeştdə yerləşən Seçeni Milli Kitabxanasında Azərbaycan ədəbiyyatı bölməsinin açılış mərasimi keçirilib.
Zefer.media xəbər verir ki, tədbirdə çıxış edən kitabxananın direktoru David Rozsa Macarıstan və Azərbaycan arasında mədəni əməkdaşlığın son illərdə əhəmiyyətli dərəcədə inkişaf etdiyini vurğulayıb. O bildirib ki, yeni bölmənin yaradılması iki xalq arasında mədəni dialoq və əməkdaşlığın mühüm göstəricisidir.
Direktorun sözlərinə görə, bu cür təşəbbüslər xalqlar arasında qarşılıqlı anlaşmanı gücləndirir və ortaq dəyərlərin təbliğinə xidmət edir. O həmçinin qeyd edib ki, Azərbaycan Milli Kitabxanası ilə Seçeni Milli Kitabxanası arasında əməkdaşlıq uğurla davam edir və 2032-ci ilə qədər qüvvədə olan müqavilə birgə layihələrin həyata keçirilməsi üçün möhkəm zəmin yaradır.
Açılış mərasimində Azərbaycanın Macarıstandakı fövqəladə və səlahiyyətli səfiri Tahir Tağızadə də çıxış edib. O, Azərbaycan ədəbiyyatı bölməsinin yaradılmasını iki ölkə arasında strateji tərəfdaşlıq və dostluq münasibətlərinin bariz nümunəsi kimi qiymətləndirib.
Aytən Yalçınqızı
