Korsikanın altı əsas limanında — Ayaçço, Bastia, Propriano, İl-Russ, Bonifacio və Porto-Vekkioda balıqçılar çərşənbə axşamı səhər saatlarından etibarən gəmilərin hərəkətini bloklayaraq etiraz aksiyasına başlayıblar.
Zefer.media “France 24” saytına istinadən xəbər verir ki, Yaxın Şərqdəki münaqişə fonunda yanacaq qiymətlərinin kəskin artması adadakı balıqçılıq sektorunu “ölüm spiralı”na sürükləyib. Adada yanacaq qiymətlərinin qitə ilə müqayisədə xeyli yüksək olmasından şikayət edən etirazçılar, subsidiyalı dizel yanacağının litrinin cəmi bir ay ərzində 0,64 avrodan 1,09 avroya qalxmasına dərhal reaksiya verilməsini tələb edirlər. Bu blokada səbəbindən Marseldən gələn “Corsica Linea” bərələri və müxtəlif kruiz gəmiləri limanlara daxil ola bilməyərək marşrutlarını dəyişməyə və ya ləngiməyə məcbur olublar ki, bu da təxminən 3000-ə yaxın sərnişinin səfər planına təsir edib. Korsika Həmkarlar İttifaqının nümayəndəsi Jozef Sanna bildirib ki, aksiyanın əsas qayəsi Korsika ilə Fransanın digər bölgələri arasında iqtisadi tarazlığın bərpasıdır.
Yerli prefektura isə blokadanın dərhal aradan qaldırılması şərti ilə balıqçıları çərşənbə günü danışıqlara dəvət edib. Materikdəki balıqçılardan fərqli olaraq, korsikalı dənizçilər rəsmi danışıqları gözləməkdən imtina edərək qiymətlərin dərhal aşağı salınmasında israr edirlər.
Aytən Yalçınqızı
