İsrail Xəzər dənizində İran gəmilərinə zərbələr endirib, bu barədə “Tayms of İsrael” qəzetinin məlumatında deyilir.Bildirilib ki, İranın Ənzəli limanında çoxsaylı partlayışlar qeydə alınıb.
Mövzu ilə bağlı Zefer.media – ya açıqlamasında siyasi şərhçi Tural İrfan bildirib ki, bölgədə gərginliyin artması region ölkələri üçün də narahatlıq yaradır:
“ABŞ-nin İrana qarşı təzyiq çəmbərini daraltması, Xəzər dənizində İran gəmilərinə zərbələr endirməsi qarşıdurmanın əhatə dairəsini genişləndirə bilər. Region ölkələri birbaşa bu münaqişəyə qoşulmasalar da, vəziyyətin daha təhlükəli hal alması istisna deyil.Bununla belə, ABŞ əsasən İranın öz maraq və strateji nöqtələrini hədəfə alır. Bu baxımdan digər ölkələrin birbaşa müdaxiləsi gözlənilmir. Ənzəli limanından istifadə ilə bağlı yaranmış narahatlıq isə müharibə başa çatana qədər davam edəcək.Ümumilikdə, İranda hakimiyyətin idarəçilik üsulu və mövcud ideoloji sistemin dövrün tələblərinə uyğun olmaması bölgəyə mənfi təsir göstərir. Hazırda yaranmış gərginliyin ABŞ tərəfindən formalaşdırıldığı düşünülürsə, bu vəziyyət müvəqqəti xarakter daşıyır. Lakin İran rejiminin yaratdığı nüvə təhdidi daha ciddi və uzunmüddətli risk kimi qiymətləndirilir.Qeyd olunur ki, İran rejimi xalqdan müəyyən mənada “qalxan” kimi istifadə edir və prezidentə də danışıqlar aparmaq üçün kifayət qədər səlahiyyət verilmir. Bu isə münaqişənin diplomatik yolla həllini çətinləşdirir. Eyni zamanda, rejimin müharibənin coğrafiyasının genişlənməsində maraqlı olduğu iddia edilir.Bununla yanaşı, onun dayaq nöqtələrinin zəiflədiyi və gələcəkdə ciddi sarsıntılarla üzləşə biləcəyi ehtimal olunur. Bu müddətdə həm İranda, həm də ümumilikdə regionda gərginlik davam edəcək. ABŞ–İran qarşıdurması bitməyənə qədər bu narahat vəziyyətin qalacağı gözlənilir”.
Qəmər Kazımzadə
