Bu gün İran Xarici İşlər Nazirliyinin sözçüsü İsmayıl Bəqayi ABŞ prezidenti Donald Trampın Vaşinqton və Tehran arasında yeni danışıqların başlanacağı barədə açıqlamasını yalanlayıb.
Zefer.media xəbər verir ki, Bəqayi mətbuat konfransında bildirib:
“Hazırda ABŞ ilə heç bir danışıqlar aparılmır və müzakirələr yalnız Oman vasitəsilə Hörmüz boğazında təhlükəsiz gəmiçiliyin təmin olunmasına yönəlib”.
Onun sözlərinə görə, İran və Oman Hörmüz boğazında təhlükəsiz naviqasiyanı təmin edəcək müvəqqəti marşrutun mümkün qədər tez müəyyənləşdirilməsi üçün əməkdaşlıq edir.
XİN sözçüsü deyib ki, ABŞ dəniz blokadasını davam etdirdiyi və “təcavüzkar siyasətini” dəyişmədiyi müddətdə Hörmüz boğazındakı mövcud vəziyyət dəyişməyəcək.
Xatırladaq ki, bundan öncə Tramp Səudiyyə Ərəbistanı, BƏƏ, Qətər və İranın xahişi ilə Tehranla yeni danışıqların başlanmasına razılıq verdiyini və görüşlərin həmin gün keçirilməsinin planlaşdırıldığını bildirmişdi.
Zərintac Mayisqızı
