Bu gün İran Silahlı Qüvvələrinin Baş Qərargah rəisi Əli Abdullahi Fars körfəzi ölkələrinə ABŞ ilə hərbi əməkdaşlıqla bağlı sərt xəbərdarlıq edib.
Zefer.media xəbər verir ki, Abdullahi “X” hesabındakı paylaşımında Körfəz ölkələrini İrana qarşı mümkün hərbi əməliyyatlarda ABŞ qüvvələrinə hər hansı formada yardım göstərməməyə çağırıb.
O bildirib ki, ABŞ-nin öz ərazilərindən İrana qarşı istifadə etməsinə rəsmi icazə vermədiyini bildirən ölkələr də vəziyyətin Tehran tərəfindən diqqətlə izlənildiyini nəzərə almalıdır.
İran rəsmisi bölgədəki ABŞ hərbi bazalarında, xüsusilə yanacaqdaşıyan tanker təyyarələrinin yerləşdirilməsinə də diqqət çəkib. Onun sözlərinə görə, bu qədər sayda hərbi təyyarənin ev sahibi ölkələrin məlumatı olmadan həmin bazalarda yerləşdirilməsi mümkün deyil.
Abdullahi əlavə edib ki, ABŞ ordusuna göstərilən istənilən yardım hərbi əməliyyatlarda iştirak kimi dəyərləndiriləcək.
Bu arada ABŞ-də iranlı siyasi müxalifə sui-qəsd edildi.
Belə ki, İran Məşrutə Partiyasının baş katibi Fuad Paşayi ABŞ-nin Los-Anceles şəhərində sui-qəsdə məruz qalıb.
Partiyanın sosial media hesabında yayılan məlumata görə, hadisə avqustun 17-də axşam saatlarında baş verib. Silahlı hücum nəticəsində ağır yaralanan Paşayi xəstəxananın reanimasiya şöbəsinə yerləşdirilib.
Hadisə ilə bağlı polis tərəfindən araşdırmaya başlanıldığı bildirilir. Ancaq sui-qəsdin kim tərəfindən və hansı motivlə törədildiyi hələlik məlum deyil.
Qeyd edək ki, İran Məşrutə Partiyası İslam Respublikasına qarşı müxalif mövqeyi ilə tanınır və monarxiya tərəfdarı siyasi qurumlardan biridir.
Zərintac Mayisqızı
