Hörmüz boğazında gəmi keçidlərinin sayı azalıb, Bab əl-Məndəb boğazında isə dəniz hərəkəti artıb.
Zefer.media xəbər verir ki, buna dair gəmilərin izlənilməsini təmin edən “Marine Traffic” platforması bildirib.
Son sutka ərzində Hörmüz boğazından 8 təsdiqlənmiş gəmi keçidi qeydə alınıb ki, bu da əvvəlki günlə müqayisədə 33 faiz azalma deməkdir. Vurğulanır ki, gəmilərin əksəriyyəti həmin marşrutdan keçid zamanı “birtərəfli İran planı” adlandırılan sxemdən istifadə edib.
Eyni zamanda, Bab əl-Məndəb boğazından 26 təsdiqlənmiş keçid qeydə alınıb. Bu göstərici əvvəlki günlə müqayisədə 18 faiz artım təşkil edib. Keçidlərdən üçünün isə gəmilərin avtomatik identifikasiya sistemlərini (AIS) söndürdüyü səssiz rejimdə həyata keçirildiyi deyilir.
Məlumatda qeyd olunur ki, husilərin Qırmızı dənizdə gəmiçiliyə yönəlmiş təhdidlərinə baxmayaraq, Bab əl-Məndəbdə dəniz hərəkətinin həcmi ötən illə müqayisədə ciddi dəyişməyib.
Zərintac Mayisqızı
