Bu gün İran Xarici İşlər Nazirliyinin sözçüsü İsmayıl Bəqayi mətbuat konfransında bildirib ki, İranın ABŞ ilə danışıq tələb etdiyi barədə yayılan məlumatlar qarşı tərəfin informasiya taktikasının bir hissəsidir.
Zefer.media xəbər verir ki, bu barədə İran mediası məlumat yayıb.
Bəqayi vurğulayıb ki, İran milli maraqlarını qorumaq üçün diplomatik vasitələrdən istifadə etməkdən heç vaxt çəkinməyib və diplomatiyanı bu məqsədə xidmət edən əsas vasitələrdən biri hesab edir. Bununla yanaşı, o qeyd edib ki, İran qarşı tərəfin yanlış qiymətləndirə biləcəyi addımlar atmayacaq və ABŞ-nin “təcavüzkar addımları” davam etdiyi müddətdə əsas diqqət müdafiəyə yönələcək.
İran XİN sözçüsü əlavə edib ki, vasitəçilər ABŞ tərəfindən regiondakı vəziyyətlə bağlı mesajlar çatdıra bilərlər, lakin hazırda İran və ABŞ arasında heç bir birbaşa danışıq aparılmır. O, bildirib ki, ABŞ ilə birbaşa danışıqlar tələb etmək İranın siyasi yanaşmasına uyğun deyil.
Zərintac Mayisqızı
