İran Suriyadakı Ət-Tanf hərbi bazasında yerləşən ABŞ xüsusi əməliyyatlar komandanlıq mərkəzinə hücum edib, bu barədə SEPAH məlumat yayıb.
“Hücum İranşəhrdə İran əsgərlərinin öldürülməsinə qarşı cavab addımıdır. İran Hörmüz boğazına tam nəzarəti saxlayır və ABŞ-ın yenilənmiş hücumları davam etdiyi müddətcə su yolu ilə heç bir neft və ya qaz ixrac olunmayacaq”, – məlumatda bildirilib.
İran müharibə başlayandan bəri ilk dəfə olaraq Suriyaya zərbələr endirib və bu xüsusi diqqət çəkir.
Politoloq Əli Mustafa Zefer.media-ya açıqlaması zamanı bildirib ki, həmin hücumun əsas hədəfi Suriya dövləti deyil, Suriyadakı Amerika hərbi varlığıdır:
“İranın Suriyanın Ət-Tanf hərbi bazasına endirdiyi zərbə birbaşa Suriya dövlətinə deyil, bu ölkədə yerləşən ABŞ hərbi qüvvələrinə qarşı yönəlib. Hədəf məhz Amerikanın bazalarıdır. İran tərəfi bu addımı öldürülən hərbçilərinə cavab olaraq atdığını bildirir və hücum nəticəsində bazadakı helikopterlərin, eləcə də bəzi radar sistemlərinin məhv edildiyini iddia edir. Hadisə Suriya ərazisində baş versə də, mahiyyət etibarilə ABŞ-İran qarşıdurmasının tərkib hissəsidir. İndiyədək Suriyadakı Amerika bazalarına belə bir hücumun baş verməməsi bu hadisəni yeni mərhələ kimi qiymətləndirməyə əsas verir. Eyni zamanda, bunun Hizbullaha göndərilən silahların Suriya tərəfindən ələ keçirilməsi ilə bağlı atılmış addım olması ehtimalı da istisna edilmir. Bununla belə, əsas hədəfin ABŞ hərbi bazaları olduğu görünür”.
Həmçinin politoloq onu da vurğulayıb ki, ABŞ-İran qarşıdurması davam edir və bu proses ABŞ-nin planlarını ciddi şəkildə dəyişməyəcək:
“ABŞ və İran arasında gərginlik özünəməxsus məntiqlə davam edir. Bu qarşıdurmanın həm açıq görünən, həm də pərdəarxası məqamları var. ABŞ İran ərazisində müəyyən etdiyi hərbi obyektlərə zərbələr endirir, hazırda isə dağların altında yerləşən raket və pilotsuz uçuş aparatlarının saxlanıldığı bazaların giriş-çıxışlarını da hədəfə almağı planlaşdırır. Hesab edirəm ki, İranın Suriyadakı ABŞ bazasına hücumu ABŞ-ın planlarında ciddi dəyişiklik yaratmayacaq və ABŞ İrana qarşı əməliyyatlarını davam etdirəcək. Bununla yanaşı, tərəflərin məqsədinin sülhə nail olmaq, razılıq əldə etmək, yoxsa qarşı tərəfi tam şəkildə geri çəkilməyə məcbur etmək olduğu hələ də açıq sual olaraq qalır. Hazırda aydın görünən əsas məqam isə qarşıdurmanın davam etməsi və münaqişə coğrafiyasının Suriyanı da əhatə edəcək şəkildə genişlənməsidir. Bununla belə, hələki bu prosesin İranla Suriya arasında birbaşa qarşıdurmaya səbəb olacağını düşünmürəm”.
Qəmər Kazımzadə
