13 may Azərbaycan hərbi xadimi, Respublikanın Müdafiə Nazirliyinin Xüsusi Təyinatlı Qüvvələr komandanı, general-mayor, İkinci Qarabağ müharibəsinin veteranı Ələkbər Məhəmməd oğlu Cahangirovun doğum günüdür.
Zefer.media xəbər verir ki, o, Salyan rayonunun Aşağı Noxudlu kəndində dünyaya gəlib.
Ələkbər Cahangirov Azərbaycan Ordusunun polkovniki rütbəsində olarkən 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olmuş ərazilərin azad edilməsi və ərazi bütövlüyümüzün bərpa olunması üçün başlamış şanlı Vətən müharibəsində hərbi hissə komandiri kimi iştirak edib. Cəbrayılın və Şuşanın azadlığı uğrunda gedən döyüşlərdə şərəflə vuruşub.
Düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi cəsarət, qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Respublikası Prezidentinin 9 dekabr 2020-ci il tarixli Sərəncamına əsasən Ələkbər Cahangirova “Vətən Müharibəsi Qəhrəmanı” adı verilib.
Cəbrayıl və Şuşa rayonlarının işğaldan azad edilməsi uğrunda aparılan döyüş əməliyyatlarına qatılaraq böyük şücaət nümayiş etdirdiyinə görə Azərbaycan Respublikası Prezidentinin 24 dekabr 2020-ci il və 29 dekabr 2020-ci il tarixli müvafiq sərəncamlarına əsasən “Cəbrayılın azad olunmasına görə” və “Şuşanın azad olunmasına görə” medalları ilə təltif edilib.
Cəsur hərbçimiz həmçinin, “Azərbaycan Bayrağı” ordeni, “Heydər Əliyevin 100 illiyi (1923-2023)” yubiley medalına layiq görülüb.
O, Azərbaycan Respublikası Prezidentinin 6 iyun 2024-cü il tarixli Sərəncamı ilə Azərbaycan Respublikası Müdafiə Nazirliyinin Xüsusi Təyinatlı Qüvvələr komandanı təyin olunub. 7 noyabr 2024-cü ildə Ə. Cahangirova general-mayor ali rütbəsi verilib.
Zərintac Mayisqızı
