Fransa hakimiyyəti oktyabrın 31-də ölkə miqyaslı etiraz aksiyaları zamanı asayişin qorunması üçün təxminən 70 min polis və jandarm əməkdaşını səfərbər edəcək. Daxili işlər naziri Loran Nunesin sözlərinə görə, əməliyyatlara xüsusi təyinatlı qüvvələr, zirehli transportyorlar, helikopterlər və su şırnaqlı maşınlar da cəlb olunacaq.
Zefer.media “Minval”a istinadən xəbər verir ki, nazir mətbuat konfransında bildirib ki, hüquq-mühafizə orqanlarının 70 min əməkdaşı cəlb ediləcək. Bu, oktyabrın 24-dəki göstərici ilə eynidir. Əməliyyatlarda BRI, RAID və GIGN xüsusi təyinatlı bölmələri, pilotsuz uçuş aparatları, helikopterlər, atlı polis dəstələri və xidməti itlərdən ibarət bölmələr iştirak edəcək.
Nunesin sözlərinə görə, Paris də daxil olmaqla, ölkə üzrə 26 “Centaure” zirehli transportyoru yerləşdiriləcək və bütün su şırnaqlı maşınlardan istifadə olunacaq.
Nazir qeyd edib ki, təhlükəsizliyin təmin edilməsi məqsədilə bəzi əməkdaşlar məzuniyyətdən geri çağırılıb.
O, xüsusilə qarət hallarına qarşı hüquq pozuntularının qarşısının alınmasında son dərəcə sərt tədbirlər görüləcəyini bildirib. Saat 20:00-dan sonra bütün toplantılar qadağan ediləcək və sistemli şəkildə dağıdılacaq. Bundan əlavə, şəhərlərin mərkəzi rayonlarında aksiyaların keçirilməsinə icazə verilməyəcək, dəmir yolu vağzallarında və avtomobil yollarında nəzarət ötən həftə ilə müqayisədə gücləndiriləcək.
