Paytaxt Bakı şəhərinin Sabunçu rayonu, Bakıxanov qəsəbəsi, Gəray Əsədov küçəsindəki fərdi yaşayış evində çökmə olub. Fövqəladə Hallar Nazirliyinin Xüsusi Riskli Xilasetmə Xidmətinin xilasediciləri çağırış üzrə cəlb olunub. Hadisə yerində əməliyyat şəraiti qiymətləndirilərkən, torpaq uçqunu səbəbindən fərdi yaşayış evinin bir hissəsinin çökməsi nəticəsində 1996-cı il təvəllüdlü Hüseynova Günel Etibar qızının müxtəlif dərəcəli bədən xəsarətləri alaraq dağıntı altında qaldığı müəyyənləşdirilib. Xilasedicilər xüsusi vasitələrin köməyi ilə dağıntı altında qalan vətəndaşı xilas edərək təcili tibbi yardım briqadasına təhvil veriblər.
Baş verən həmin hadisələr beynimizdə belə suallar yaradır: “Evlər niyə çökür”, “Mənzillərin tikintisində təhlükəsizlik amilləri nəzərə alınmır?” və s.
Əmlak məsələləri üzrə ekspert Elnur Fərzəliyev Zefer.media-ya açıqlamasında deyib ki, son günlər yağan güclü yağışlar səbəbindən Bakı və Abşeron ərazisində yüzlərlə fərdi yaşayış evləri, habelə digər növ daşınmaz əmlaklar su basmaya məruz qalıblar:
“Başqa bir tərəfdən paytaxtımızın relyefinə nəzər salsaq şəhərin əksər yerlərində yeraltı qrunt sularının axması, zamanla yeraltı təbii proseslərin baş verməsi səbəbindən qrunt sularında istiqamətlərin dəyişməsi ilə həmin yön üzərində inşa olunan ağır tonajlı mənzillərdə müəyyən deformasiya, çatlar və bəzən belə çökmələr əmələ gəlir”.
Əmlak eksperti əlavə edib ki, intensiv yağışlar artıq bir çox ərazilərdəki mənzillərin təmir keyfiyyəti ilə bərabər tikintinin keyfiyyətinə də ciddi şəkildə mənfi təsir göstərib:
“Yağıntıların uzunmüddətliliyi artıq torpaqlarda çökmələr nəticəsində onların üzərində inşa olunmuş evlərdə çatların yaranmasına gətirib çıxarıb.
İstər fərdi yaşayış evləri, istərsə də digər növ tikinti işləri aparılarkən qeyd olunan tikililərin bünövrəsi həcmlərinə uyğun formada qazılmaqla yanaşı torpağın sərtlik, yumşaqlığı və s. ciddiyyətlə nəzərə alınmalıdır”.
Zərintac Mayisqızı
