“Zefer.media” redaksiyasına İsmayıllı rayonunun Cülyan kəndi ərazisindən keçən çay sahili ilə bağlı şikayət daxil olub. Vətəndaş tərəfindən təqdim olunan fotoşəkillərdə çay yatağının və sahil zolağının plastik qablar, sellofan torbalar və müxtəlif məişət tullantıları ilə çirkləndirildiyi aydın görünür.
Məlumata görə, tullantıların toplandığı ərazinin yaxınlığında A-frame üslubunda və digər tipli kirayə istirahət evləri, kotteclər fəaliyyət göstərir. Ərazidəki acınacaqlı mənzərənin bir neçə səbəbdən yarandığı ehtimal edilir: buraya istirahətə gələn turistlərin məsuliyyətsizliyi, yerli sakinlərin tullantıları çay kənarına atması və ya dağlıq ərazidə baş verən sel sularının yuxarı hissələrdən zibilləri yuyaraq bu əraziyə gətirməsi.
Konkret mənbə müəyyənləşdirilmədiyi üçün aidiyyəti qurumların ərazidə monitorinq aparmasına ciddi ehtiyac var. Suda və daşların arasında yığılıb qalan plastik tullantılar ətraf mühitə, biomüxtəlifliyə və çayın ekosisteminə böyük ziyan vurur.
“Zefer.media” olaraq, həm gələn qonaqları, həm də yerli əhalini təbiətə qarşı daha həssas olmağa çağırırıq. Eyni zamanda, Ekologiya və Təbii Sərvətlər Nazirliyinin yerli qurumlarından və İsmayıllı Rayon İcra Hakimiyyətindən ərazinin təmizlənməsi və tullantıların qarşısının alınması üçün müvafiq tədbirlər görmələrini xahiş edirik.
