26 mart 2026-cı il tarixində BƏƏ-nin hava hücumundan müdafiə sistemləri İran ərazisindən buraxılan 15 ballistik raket və 11 PUA-nı zərərsizləşdirib.
Zefer.media xarici mətbuata istinadən xəbər verir ki, bu barədə BƏƏ Müdafiə Nazirliyi “X” sosial şəbəkəsində məlumat verib.
“İranın hücumları başlayandan bəri BƏƏ-nin hava hücumundan müdafiə qüvvələri ümumilikdə 372 ballistik raketi, 15 qanadlı raketi və 1 826 pilotsuz uçuş aparatını zərərsizləşdirib.
Hücumlar nəticəsində 2 hərbi qulluqçu, həmçinin silahlı qüvvələrlə müqavilə əsasında çalışan Mərakeşdən olan mütəxəssis həlak olub. Bundan əlavə, Pakistan, Nepal, Banqladeş, Fələstin və Hindistan vətəndaşları olan 8 nəfər də həyatını itirib. Ümumilikdə 169 nəfər müxtəlif dərəcəli xəsarətlər alıb.
BƏƏ Müdafiə Nazirliyi istənilən təhdidlərə cavab verməyə tam hazırdır və ölkənin təhlükəsizliyini pozmağa yönəlmiş istənilən hərəkətlərə qarşı qətiyyətlə mübarizə aparacaq, onun suverenliyinin, təhlükəsizliyinin və sabitliyinin, eləcə də milli maraqlarının və imkanlarının qorunmasını təmin edəcək”, – deyə, məlumatda qeyd olunub.
