BƏƏ-nin OPEC-dən çıxmaq qərarı, qismən, bazarda neft tədarükü məhdud olan Hörmüz boğazının tankerlər üçün effektiv şəkildə bağlanması ilə birbaşa bağlıdır.
Zefer.media xəbər verir ki, bunu ölkənin Energetika və İnfrastruktur naziri Süheyl əl-Məzrui bildirib.
Birləşmiş Ərəb Əmirliklərinin (BƏƏ) dövlət xəbər agentliyi “WAM” qeyd edib ki, BƏƏ 1 may tarixindən etibarən OPEC və OPEC+ təşkilatlarından çıxacaq.
Əl-Məzrui CNBC-yə verdiyi müsahibədə vurğulayıb: “Tələb və təklif balansına, mövcud məhdudiyyətlərlə bağlı qlobal vəziyyətə və Hörmüz boğazının bağlanmasına baxsaq, bu amillər Fars körfəzindən xam neft və hazır məhsulların axınını məhdudlaşdırır. Bu vəziyyətdə biz əvvəlki bütün strategiyalardan fərqli strategiyalar tətbiq etməli və hərəkət etməliyik”.
Əmirliklərin energetika naziri həmçinin qeyd edib ki, BƏƏ qısa müddətdə, “sabah” neft hasilatını artıra bilməz və istəmir, çünki digər Körfəz ölkələri kimi, Hörmüz boğazının bağlanması səbəbindən hələ də eyni məhdudiyyətlərlə üzləşir.
“Bütün dünyanın diqqət yetirməli olduğu bir məhdudiyyət və risk var və bu risk Hörmüz boğazının bağlanmasıdır. Boğaz açılmalı və gəmilərin sərbəst hərəkəti təmin edilməlidir”, – deyə o əlavə edib.
Zərintac Mayisqızı
