“Maarifçilik Şurası” İctimai Birliyi hicab mövzusundan manipulyasiya yolu ilə istifadə edilərək ölkədə ictimai-siyasi gərginlik yaradılması cəhdlərindən narahatlığını ifadə edib.
Zefer.media xəbər verir ki, birlik bu cür cəhdlərin ölkədə sabitliyə, tolerantlıq mühitinə və milli-mənəvi dəyərlərə qarşı yönəldiyini vurğulayıb.
“Azərbaycan konstitusiya prinsiplərinə əsaslanan dünyəvi və sivil dövlətdir. Ölkədə vicdan və dini etiqad azadlığı qanunvericiliklə təmin edilir, müxtəlif dini inanclara malik vətəndaşların dinc yanaşı yaşamasına imkan verən tolerantlıq mühiti yaradılıb.
Qeyd olunur ki, dini hisslərdən və geyim seçimi azadlığından cəmiyyətdə qarşıdurma yaratmaq, gənclərin milli özünüdərk prosesinə təsir göstərmək və ölkədə xarici maraqlara uyğun gündəmi irəli sürmək üçün siyasi vasitə kimi istifadə edilməsi yolverilməzdir.
Təşkilat bildirib ki, xarici maliyyələşmə və layihələr vasitəsilə ölkədə süni gərginlik yaratmağa, ictimai sabitliyi və asayişi pozmağa yönəlmiş təşəbbüslər xalqın birliyi, dövlətin qətiyyəti və cəmiyyətin sayıqlığı sayəsində uğursuzluğa məhkumdur.
“Maarifçilik Şurası”nın bəyanatında vurğulanıb ki, Azərbaycanın təhsil sistemi milli və dünyəvi dəyərlər əsasında formalaşıb. Məktəblər və universitetlər siyasi intriqalar, xarici təsirlər və radikal çağırışlar üçün platformaya çevrilməməlidir. Təşkilat həmçinin dinin siyasiləşdirilməsinə və dövlətin fundamental prinsiplərinə zidd məqsədlər üçün istifadə olunmasına etiraz edib”.
Lalə Qurbanlı
