Qırğız Respublikasının Prezidenti Sadır Japarov BMT-nin Ümumdünya Şəhərsalma Forumunun 13-cü sessiyasında (WUF13) iştirak etmək məqsədilə mayın 17-də Azərbaycan Respublikasına səfərə gəlib. Heydər Əliyev Beynəlxalq Aeroportunda ali qonağı Azərbaycanın səhiyyə naziri Teymur Musayev və digər rəsmi şəxslər qarşılayıblar.
Bakı və Bişkek arasındakı əlaqələrdən bəhs edən Deputat Elman Nəsirov Zefer.media–ya açıqlamasında bildirib ki, Azərbaycan beynəlxalq tədbirlərin təşkili sahəsində böyük təcrübəyə malik olduğunu bir daha nümayiş etdirir:
“Azərbaycan Respublikası yenidən mötəbər bir beynəlxalq tədbirə ev sahibliyi edir. Dünyanın diqqət mərkəzində olan BMT-nin Ümumdünya Şəhərsalma Forumunun 13-cü sessiyasının Azərbaycanda keçirilməsi olduqca təqdirəlayiq haldır. Çünki ölkəmiz ən yüksək səviyyəli beynəlxalq tədbirlərin hazırlanması və təşkili sahəsində artıq qabaqcıl bir nümunə ortaya qoyub. Birinci Avropa Oyunları, Dördüncü İslam Həmrəyliyi Oyunları, “Eurovision” mahnı müsabiqəsi və 2024-cü ildə yüksək səviyyədə təşkil olunmuş COP29 tədbiri buna bariz nümunədir. Bütün bunlar bir daha sübut edir ki, Azərbaycan nəhəng beynəlxalq tədbirlərin keçirilməsində böyük təcrübəyə malikdir. Ölkəmizin hər tədbirdə nümayiş etdirdiyi təşkilatçılıq modeli analoji tədbirlərə ev sahibliyi edəcək digər dövlətlər üçün bir örnək rolunu oynayır.
Bu mötəbər tədbir çərçivəsində Azərbaycana səfər edən qonaqlardan biri də Qırğız Respublikasının Prezidenti cənab Sadır Japarovdur. Azərbaycan ilə Qırğızıstan arasındakı münasibətlər hazırda yüksək səviyyədə inkişaf edir. Bu əlaqələrin indiki müstəviyə yüksəlməsində Azərbaycan Respublikasının Prezidenti cənab İlham Əliyev və Qırğız Respublikasının Prezidenti cənab Sadır Japarov arasındakı sıx və səmimi dostluq münasibətlərinin böyük rolu var. Xalqlarımızın eyni köklərə malik dostluğu, dövlət başçılarımızın və ölkələrimizin səmimi tərəfdaşlığı Qırğızıstan Prezidentinin bu Forumda yaxından iştirakını şərtləndirən əsas amillərdəndir.
Azərbaycan Ümumdünya Şəhərsalma Forumunun 13-cü sessiyasında Qarabağ və Şərqi Zəngəzurun bərpası, orada müasir infrastrukturun qurulması, şəhər və kəndlərin salınması istiqamətində atdığı mühüm addımları da nümayiş etdirir. Qırğız Respublikası da işğaldan azad olunmuş ərazilərin bərpası prosesinə öz töhfəsini verir ki, bu da dostluğumuzun möhkəmlənməsi baxımından olduqca əhəmiyyətlidir. Uğurla icra edilən bu layihələr çərçivəsində Azərbaycan dövləti Qarabağ və Şərqi Zəngəzurda infrastruktur və şəhərsalma işlərinə indiyədək 14,7 milyard dollar vəsait xərcləyib. Bu, kifayət qədər böyük bir göstəricidir və 2028-ci ilə qədər sözügedən rəqəmin 18 milyard dollara çatdırılması nəzərdə tutulur”.
Deputat həmçinin qeyd edib ki, Forumun Bakıda keçirilməsi Azərbaycanın beynəlxalq nüfuzunun daha da möhkəmlənməsinə xidmət edir:
“Belə bir tədbirin keçirilməsi Azərbaycanın beynəlxalq imicinə müsbət təsir etməklə yanaşı, regional əməkdaşlıq baxımından da mühüm hadisədir. Tədbir dünyada şəhərsalma mədəniyyətinin inkişafı nöqteyi-nəzərindən böyük aktuallıq kəsb edir. Belə bir yüksək səviyyəli tədbirin Bakıda təşkili Azərbaycanın həm beynəlxalq aləmdə, həm də regionda yerini və rolunu möhkəmləndirir, onun sülhpərvər dövlət olduğunun bariz göstəricisidir. Azərbaycan yalnız quruculuq proseslərinə töhfə vermir, həm də öz paytaxtından dünyaya urbanizasiya problemlərinin həlli, şəhər iqliminin tənzimlənməsi, turizm potensialının inkişaf etdirilməsi və şəhərsalma mədəniyyəti sahəsində qazanılmış nailiyyətlərin bölüşülməsi üçün yeni imkanlar açır. Bu baxımdan, Forumun ölkəmizdə keçirilməsi Azərbaycanın beynəlxalq nüfuzunun daha da yüksəlməsinə xidmət edir”.
Lalə Qurbanlı
