Tayvan İranla yaşanan müharibənin ABŞ-nin uzun mənzilli qanadlı raket ehtiyatlarını tükətdiyi və bu vəziyyətin Çinin mümkün işğalına qarşı müdafiəni zəiflətdiyi səbəbilə narahatlığını ifadə edib.
Zefer.media “TRT Xəbər”- ə istinadən bildirir ki, ABŞ-nin Orta Şərqdəki qarşıdurmalar zamanı yüzlərlə Müştərək Hava-Səth Dəqiq Mərmisi (JASSM) və gəmidən buraxılan Tomahavk raketlərindən istifadə etdiyi təxmin edilir.
Müdafiə üzrə ekspertlər bildiriblər ki, hər iki silah qarşıdurma zamanı düşmənin hava müdafiə zonasından kənardan buraxıla bildiyi üçün Tayvanın müdafiəsində kritik rol oynayacaq.
Yüksək səviyyəli bir Tayvanlı müdafiə rəsmisi bildirib ki, ABŞ qüvvələri Tayvana mümkün hücumu dəf etmək üçün lazım olan sursatları başqa bölgələrdə istifadə edir və bu vəziyyət çəkindiriciliyi zəiflədir.
Tayvanın milli təhlükəsizlik rəsmiləri isə ABŞ-nin imkanlarını digər cəbhələrə həddindən artıq yönəltməsinin balanssızlıq yaradacağını vurğulayıblar.
Strateji və Beynəlxalq Araşdırmalar Mərkəzi (CSIS) tərəfindən hazırlanan hesabatda qeyd olunub ki, ABŞ ordusu İranla müharibənin ilk altı günündə 786 JASSM və 319 Tomahavk raketi atıb. Bu rəqəmlər həmin raketlərin bir neçə illik istehsal həcminə bərabərdir.
Lalə Qurbanlı
