ABŞ “Hizbullah”ın maliyyələşdirilməsi ilə əlaqəli olduğu ehtimal edilən şəbəkəyə qarşı yeni sanksiyalar elan edib.
Zefer.media “The Times of Israel”ə istinadən xəbər verir ki, sanksiyaların tətbiqinə səbəb şəbəkənin İranla sıx əlaqələrinin olmasıdır.
ABŞ Maliyyə Nazirliyinin açıqlamasında “Hizbullah”ın terror təşkilatı kimi hüquqi statusunun genişləndirildiyi bildirilib. Yeni təsnifatda təşkilatın SEPAH-ın, xüsusilə də onun “Qüds” qüvvələrinin rəhbərliyi altında İran rejiminin maraqları naminə fəaliyyət göstərdiyi qeyd olunub.
ABŞ Dövlət Departamentinin nümayəndəsi bildirib ki, yeni təsnifat “Hizbullah”ın əvvəlki yanaşmada nəzərdə tutulduğu kimi müstəqil təşkilat deyil, İranın himayəsində fəaliyyət göstərən qurum olduğunu vurğulayır.
Onun sözlərinə görə, bu addım təşkilatın Livanın suverenliyi, xalqı və dövlətinin maraqlarını faktiki olaraq nəzərə almadan fəaliyyət göstərdiyini göstərir.
ABŞ Maliyyə Nazirliyinin məlumatına görə, yeni sanksiyalar “Hizbullah”a nağd vəsait ötürən şəbəkənin üzvü olduğu ehtimal edilən 10 şəxsi əhatə edir.
Qeyd edək ki, “Hizbullah” daha əvvəl də ABŞ tərəfindən dəfələrlə sanksiyalara məruz qalıb.
Aytən Yalçınqızı
