Türkiyənin Samsun şəhərində sağlamlıq turizminin inkişafına həsr olunan beynəlxalq sammit və tibbi sərgi keçiriləcək. Tədbirdə Azərbaycanın sağlamlıq və termal turizm imkanlarının beynəlxalq iştirakçılara təqdim olunması, eləcə də bu sahədə yeni əməkdaşlıq əlaqələrinin qurulması nəzərdə tutulur.
Zefer.media xəbər verir ki, 15–18 oktyabr 2026-cı il tarixlərində Samsun Sərgi və Konqres Mərkəzində III Beynəlxalq Samsun İkiztəpə Sağlamlıq Sammiti və Şimali Anadolu Sağlamlıq və Tibbi Sərgisi təşkil olunacaq.
Tədbirin əsas məqsədi sağlamlıq turizmi sahəsində beynəlxalq əməkdaşlığı genişləndirmək, müxtəlif ölkələrin səhiyyə müəssisələri və turizm şirkətləri arasında əlaqələri gücləndirmək, həmçinin yeni investisiya və tərəfdaşlıq imkanlarını təşviq etməkdir.
Sammit və sərgidə xəstəxanaların, klinikaların, tibbi avadanlıq istehsalçılarının, estetik tibb və saç əkimi mərkəzlərinin, eləcə də sağlamlıq turizmi sahəsində fəaliyyət göstərən şirkətlərin iştirakı gözlənilir.
Beynəlxalq tədbirdə Azərbaycan Sağlamlıq və Termal Turizmə Dəstək Assosiasiyasının (AHTTSA) İdarə Heyətinin üzvləri, assosiasiyanın üzvləri və təmsilçiləri, Azərbaycan Dövlət Turizm Agentliyinin nümayəndəsi, eləcə də media nümayəndələri iştirak edəcəklər.
Səfər çərçivəsində Azərbaycanın sağlamlıq və termal turizm imkanlarının beynəlxalq auditoriyaya təqdim olunması nəzərdə tutulur. Təqdimat zamanı ölkəmizin sağlamlıq turizmi potensialının, termal və müalicəvi turizm imkanlarının, eləcə də bu sahədə fəaliyyət göstərən sağlamlıq mərkəzlərinin və turizm müəssisələrinin xidmətlərinin tanıdılmasına diqqət yetiriləcək.
Azərbaycan nümayəndə heyətinin sammitdə iştirakı ölkəmizin sağlamlıq turizmi üzrə beynəlxalq bazarda tanıdılması, xarici tərəfdaşlarla əlaqələrin genişləndirilməsi və yeni əməkdaşlıq imkanlarının araşdırılması baxımından əhəmiyyətlidir.
Tədbir, həmçinin Azərbaycan və Türkiyə arasında sağlamlıq turizmi sahəsində təcrübə mübadiləsinin aparılması, birgə layihələrin təşviqi və qarşılıqlı turizm əlaqələrinin inkişafı üçün imkan yaradacaq.
Qeyd edək ki, Azərbaycanın dövlət qurumlarının, sahə üzrə ixtisaslaşmış təşkilatların və media nümayəndələrinin iştirakı ölkəmizin sağlamlıq və termal turizm potensialının daha geniş auditoriyaya çatdırılmasına mühüm töhfə verə bilər.
