Hər il avqustun 18-i Azərbaycan Respublikasında Dövlət Sərhədi Xidməti ( DSX) əməkdaşlarının peşə bayramı günü kimi qeyd olunur.
Zefer.media xəbər verir ki, həmin əlamətdar gün sərhəd mühafizə orqanlarının yaranmasına əsaslanır və ölkə sərhədlərinin qorunmasında xidmət göstərən hərbçilərin şərəfli peşə bayramıdır.
Artıq o qürurlu tarixdən 107 il ötür.
Belə ki, 18 avqust 1919-cu il tarixində Azərbaycan Xalq Cümhuriyyətinin parlamenti ölkənin sərhədlərinin mühafizəsi haqqında qanun qəbul edib. Qanuna görə, Xalq Cümhuriyyəti Hərbi Nazirliyinin tərkibində Azərbaycanın ilk Sərhəd Qoşunları dəstəsi yaradılıb.
Azərbaycan Xalq Cumhuriyyətinin yaranmasından sonra 1919-cu ildə milli hökumətin qərarı ilə təsis edilən Hərbi Nazirliyin tərkibində ölkənin bir sıra güc strukturları, o cümlədən Sərhəd Qoşunları fəaliyyətə başlayır. Sovet İttifaqı dövründə Sərhəd Xidməti Dövlət Təhlükəsizlik Komitəsinin bir strukturu kimi fəaliyyət göstərib.
1991-ci ilin 18 oktyabrında “Müstəqillik haqqında Konstitusiya Aktı”nı qəbul etdikdən sonra milli dövlət quruculuğunun bərpası işləri başlayıb. Sözügedən illərdə dövlət sərhədinin mühafizəsi, əsasən şəxsi heyətin fiziki imkanları və SSRİ dövründən qalmış, fiziki və mənəvi cəhətdən köhnəlmiş mühəndis-texniki qurğular və texniki vasitələr hesabına həyata keçirilir, şimal və şimal-qərb istiqamətində yaradılmaqda olan sərhəd məntəqələri vaqonlarda, çadırlarda və ən yaxşı halda, uyğunlaşdırılmış binalarda yerləşirdi.
Ümumilli lider Heydər Əliyevin 2000-ci il 16 avqust sərəncamı ilə avqustun 18-nin Azərbaycanda Sərhəd Qoşunları əməkdaşlarının peşə bayramı günü kimi qeyd olunması qərara alınıb.
Dövlət Sərhəd Xidməti (DSX) 44 günlük şanlı Vətən müharibəsində Silahlı Qüvvələrin tərkib hissəsi kimi fəal iştirak edib, xüsusilə Cəbrayıl, Zəngilan və Qubadlı rayonlarının, eləcə də dövlət sərhədlərinin azad olunmasında və Arazboyu əməliyyatlarda mühüm şücaət, yüksək peşəkarlıq göstərib, şərəfli yolda şəhidlər verib.
Bu, igid, qəhrəman Vətən övladlarını təbrik edirik, Allahdan onlara çətin və bir o qədər də əzəmətli missiyalarında güc-qüvvət arzulayırıq.
Zərintac Mayisqızı
