İndoneziya hökuməti bu il Mərkəzi Papua əyalətindən olan 64 mindən çox tələbənin təhsil xərclərini qarşılayır.
Zefer.media xarici media – ya istinadən bildirir ki, bu barədə Mərkəzi Papua qubernatoru Meki Fritz Nawipa məlumat verib.
Nawipanın sözlərinə görə, proqram müxtəlif əyalətlərdə təhsil alan 58 mindən çox orta və yuxarı sinif şagirdinin, peşə məktəbi və xüsusi təhsil ehtiyacı olan şagirdlərin, eləcə də universitetlərdə oxuyan təxminən 6 min tələbənin təhsil xərclərini əhatə edir.
O bildirib ki, proqramın məqsədi maddi çətinliklərin insanların təhsil almaq imkanına mane olmasının qarşısını almaqdır.
Əyalət hökuməti həmçinin xaricdə təhsil alan Mərkəzi Papua tələbələrinə qrant proqramı çərçivəsində maliyyə dəstəyi göstərir. Bu məqsədlə hər il təxminən 30 milyard İndoneziya rupisi (təxminən 1,68 milyon ABŞ dolları) vəsait ayrılır.
Təhsilə çıxış imkanlarının genişləndirilməsi ilə yanaşı, əyalət hökuməti son iki il ərzində 1 800 müəllimin peşəkar sertifikatlaşdırılmasına dəstək verib. Müəllimlərin rifahının və tədrisin keyfiyyətinin yaxşılaşdırılması məqsədilə onlara əlavə maddi təşviqlər də təqdim olunub.
Pərvin Hacıyeva
