Hər il avqustun 5-i Azərbaycanda Hərbi Dəniz Qüvvələrinin yaranma günü kimi qeyd olunur. Ölkəmizin dəniz sərhədlərinin etibarlı mühafizəsinin təmin edilməsində mühüm rol oynayan Hərbi Dəniz Qüvvələri peşəkarlığı, döyüş hazırlığı və yüksək hazırlıq səviyyəsi ilə seçilir. Xüsusilə Hərbi Dəniz Qüvvələrinin Xüsusi Təyinatlı Qüvvələri ən çətin şəraitdə tapşırıqları yerinə yetirmək bacarığı ilə ordumuzun gücünü nümayiş etdirir.
Sözügedən əlamətdar tarix münasibətilə Hərbi Dəniz Qüvvələrinin Xüsusi Təyinatlı Qüvvələrində uzun illər xidmət etmiş, Vətən müharibəsində yaralanaraq qazi adını qazanmış Hərbi Dəniz Qüvvələrinin Xüsusi Təyinatçısı Fərzəliyev Xəyyam Zefer.media – ya açıqlamasında xidmət yolu, Hərbi Dəniz Qüvvələrinin fəaliyyəti kimi məlumatlardan söz açıb:
“2011-ci ildən Hərbi Dəniz Qüvvələrinin Xüsusi Təyinatlı Qüvvələrində xidmət etmişəm. Müharibə başlayana qədər Xüsusi Təyinatlı Qüvvələrin mənsubu kimi bir çox təlim və tədbirlərdə iştirak etmiş, müxtəlif ölkələrin hərbçiləri ilə keçirilən yarışlarda və digər peşəkar hazırlıq proseslərində iştirak edərək təcrübə qazanmışam.
Müharibə dövründə yaralandığıma görə hərbi xidmət sıralarından ayrılmışam.
O, həmçinin gənc nəslə səslənərək vurğulayıb:
” Qazi kimi vətənimizin gələcəyi olan gənclərə tövsiyəm budur ki, xidmət etdikləri qurumdan asılı olmayaraq, hər zaman Vətənin keşiyində dayanmağa hazır olsunlar. Önəmli olan hansı qüvvədə xidmət etmək deyil, hər bir vətəndaşın bacardığı qədər, əlindən gələni əsirgəmədən Vətənin müdafiəsinə töhfə verməsidir”.
Müsahibimiz Hərbi Dəniz Qüvvələrinin Xüsusi Təyinatlılarının fəaliyyətini belə dəyərləndirib:
“Hərbi Dəniz Qüvvələrinin Xüsusi Təyinatlıları bu gün dünya miqyasında tanınan peşəkar hərbi qüvvələrdəndir və Azərbaycanı, hətta vətəndaşlarımızın bir çoxunun bilmədiyi mövqelərdə belə müdafiə edirlər.
Xüsusilə diqqətə çatdırmaq istəyirəm ki, Hərbi Dəniz Qüvvələri havada, suda və quruda hər zaman, istənilən yerdə Vətənimizin keşiyində dayanır, döyüş tapşırıqlarını yerinə yetirir. Onlar istənilən vaxt və istənilən şəraitdə bütün tapşırıqları icra etməyə tam hazırdırlar və bu fəaliyyətlərini bu gün də uğurla davam etdirirlər.
Hərbi Dəniz Qüvvələrinin nümayəndələrinə həm Azərbaycanda, həm də xarici dövlətlərdə mühüm tapşırıqların icrasında rast gəlmək mümkündür. Çünki Hərbi Dəniz Qüvvələrinin döyüşçüləri hərtərəfli hazırlanır, havada, suda və quruda peşəkar döyüşçü kimi yetişdirilirlər.
Məhz buna görə də Azərbaycan Hərbi Dəniz Qüvvələri, xüsusilə də Xüsusi Təyinatlı Qüvvələri hər zaman döyüşə hazırdır və ölkəmiz üçün böyük əhəmiyyət daşıyır. Ümumilikdə isə Azərbaycan Ordusuna hər zaman ehtiyac var.
Sonda hazırda xidmət edən bütün hərbi qulluqçulara xidmətlərində uğurlar, bol nailiyyətlər arzulayıram. İnşallah, hər biri üçün xidmət yolu xeyirli və uğurlu olar”.
Pərvin Hacıyeva
