Cəmiyyətin təməlini təşkil edən ailə dəyərlərinin qorunması və gələcək nəsillərə ötürülməsi istiqamətində növbəti mühüm addım atılıb.
Zefer.media xəbər verir ki, “Gəncliyə Dəstək” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə “Ailəm – mənim dəyərim” layihəsinin icrasına başlayıb.
İki ay davam edəcək layihə Zərdab rayonunda həyata keçiriləcək.
Layihənin əsas məqsədi şagirdlərdə ailəyə sevgi, hörmət və birlik kimi dəyərlərin formalaşdırılması, valideyn–övlad münasibətlərinin daha sağlam müstəvidə inkişafına dəstək göstərilməsi və cəmiyyətdə ənənəvi ailə institutunun möhkəmləndirilməsidir. Bu təşəbbüs ailənin yalnız sosial institut deyil, həm də mənəvi dayağımız olduğunu bir daha ön plana çıxarır.
Layihə çərçivəsində məktəblilərin maarifləndirilməsi və onların ailə dəyərlərinə bağlılığının artırılması məqsədilə silsilə tədbirlərin təşkili nəzərdə tutulub. Belə ki, Zərdab rayonunun 5 məktəbində “Ailə dərsi” adlı təlimlər keçiriləcək, eyni zamanda “Ailəm” adlı interaktiv və əyləncəli bağlanış tədbiri təşkil olunacaq.
“Ailəm – mənim dəyərim” layihəsi ailə institutuna diqqətin artırılmasına, valideynlərlə övladlar arasında ünsiyyət körpüsünün daha da möhkəmlənməsinə xidmət edərək, sağlam və dəyərlərə bağlı cəmiyyətin formalaşmasına töhfə verməyi hədəfləyir.
“Gəncliyə dəstək” İctimai Birliyinin sədri – Vəfa Xəlilli
