Azərbaycan karateçisi Məhəmməd Mayıllı beynəlxalq idman arenasında növbəti uğura imza ataraq ölkəmizi qürurlandırıb. Gənc idmançının bu nailiyyəti ilə yanaşı, onun ailə kökləri də diqqət çəkir.
Belə ki, Məhəmməd 11 mart, 2013-cü ildə dünyaya göz açıb. O, 22 il Xüsusi Təyinatlı Qüvvələrdə (XTQ) xidmət etmiş qazi Şahin Mayıllının övladıdır.
Qalibiyyəti ilə bağlı, Zefer.media – ya açıqlama verən Məhəmməd Mayıllı bildirib ki, 2021-ci ildən etibarən karate ilə peşəkar şəkildə məşğul olur. Cəsur idmançı indiyədək ölkə daxilində keçirilmiş “Badamlı”, “Grand Prix” və “Olimpiya Ümidləri” kimi nüfuzlu yarışlarda iştirak edərək müxtəlif uğurlu nəticələrə nail olduğunu qeyd edib.
Türkiyədə keçirilən Dünya Şotokan Federasiyasının (WSF) dünya çempionatında çıxış edən Məhəmməd Mayıllı 12–13 yaş kateqoriyasında fərdi döyüşlərdə 3-cü yerə, komanda yarışlarında isə 2-ci yerə layiq görülüb.
Qeyd edək ki, Azərbaycanın bayrağını beynəlxalq arenalarda ucaldan gənc idmançı gələcəkdə daha böyük müvəffəqiyyətlər qazanmağı qarşısına məqsəd qoyub. Məlumat üçün onu da əlavə edək ki, idmançımız əslən Yardımlı rayonundandır, Sumqayıt şəhərində yaşayır.
Zefer.media olaraq Məhəmmədə fəaliyyətində bol uğurlar arzulayırıq, bu cür gənclərimiz sayəsində Azərbaycan bayrağı daim zirvələrdə fəxrlə, iftixarla dalğalanır!
Pərvin Hacıyeva
